“Gənclər üçün istədikləri ixtisasa yiyələnmək bir xəyala çevrilib. Azərbaycanın mövcud təhsil modeli, xüsusilə ali təhsil müəssisələrinə qəbul imtahanlarının strukturu elə cürdür ki, heç kəs gələcək peşə karyerasına uyğun olaraq sərbəst ixtisas seçə bilmir. Çünki bu seçim birbaşa gənclərin öz əlində deyil".
Bu fikirləri “Tehsil365”ə açıqlamasında Məzahir Məmmədli deyib.
Mütəxəssis bildirib ki, hazırkı sistemdə gənclərin topladığı ballar onların arzularından daha öndə dayanır.
"Məsələn, mən hüquqşünas olmaq istəyirəmsə, üçüncü qrupun şərtlərinə görə topladığım bala baxılır. Lazımi balı yığa bilmirəmsə, hüquqşünas ola bilmirəm; məcburən gedib tarix və ya ədəbiyyat müəllimi oluram. Eyni şəkildə, həkim olmaq arzusunda olan bir gəncin bu istəyi onun həvəsindən və ya iradəsindən deyil, beşinci qrup üzrə topladığı baldan asılı olur. Nəticədə, çox yaxşı həkim ola biləcək bir insan, sırf ixtisas koduna görə gedib kimya-biologiya müəllimi olur".
Onun sözlərinə görə, bu vəziyyət gənclərin gələcək planlarına mənfi təsir göstərir.
"Azərbaycanda həm əmək bazarını, həm də gələcək karyeranı sərbəst şəkildə düşünmək gənclər üçün bir xəyala çevrilib. Çünki onlar arzuladıqları, istədikləri ixtisasa gedib düşə və ona tam yiyələnə bilmirlər. Bu səbəbdən gənclərə tövsiyəm odur ki, bugünkü əmək bazarının tələblərini mütləq nəzərə alsınlar.
Gələcək peşənin perspektivlərini düşünmək, məşğulluq imkanlarını araşdırmaq və bazardakı tələbatı öyrənmək olduqca vacibdir".
Məzahir Məmmədli vurğulayıb ki, gənclər öz gələcək talelərini müəyyən edəcək qruplarda daha fəal olmalı və məqsədlərinə çatmaq üçün çalışqanlıqlarını artırmalıdırlar.
"Əgər hər hansı bir ixtisası ürəkdən arzulayırlarsa, gənclər çalışqanlıqlarını artırmalı və həmin ixtisasa uyğun keçid balını toplamaq üçün əllərindən gələni etməlidirlər. Əks halda, qeyd etdiyim kimi, o qrup üzrə təqdim olunan 15 ixtisasdan birini (təsadüfi olaraq) seçmək məcburiyyətində qalacaqlar. Ona görə də əsas hədəf əmək bazarının tələbini nəzərə almaq və gələcəkdə yeni perspektivlər açacaq müasir ixtisaslara yönəlməkdir".
"Qeyd etmək lazımdır ki, gənclər xüsusilə sosial şəbəkələrin Azərbaycan seqmentində yayılan aldadıcı vədlərə qarşı diqqətli olmalıdırlar. Bu gün TikTok, Facebook və digər platformalarda “bizə gəlin, sizi az balla ali məktəbə qəbul elətdirəcəyik” və ya “attestatla xaricdə təhsil imkanı yaradacağıq” kimi kütləvi çağırışlar edən şəxslər var. Gəncləri bu cür fırıldaqçıların toruna düşməməyə çağırıram. Hesab edirəm ki, bu tipli hay-küylü və əsassız çağırışlardan tamamilə uzaq durmaq lazımdır.” - deyə Məzahir Məmmədli qeyd edib.