“Çox vaxt düşünürük ki, qış keçdi, artıq xəstəlikdən qurtulduq. Amma həqiqət tamam fərqlidir. Yay aylarında da uşaqlarda öskürək, burun axması, hətta qrip əlamətləri tez-tez müşahidə olunur”.
Bu sözləri “Tehsil365”ə açıqlamasında həkim Elşən Tağıyev bildirib.
Həkim bildirib ki, yay aylarında bu cür xəstəliyin ən böyük günahkarı kondisionerdir.
“Yayın ən populyar “düşməni” kondisionerdir. Problem cihazın özündə yox, ondan düzgün istifadə edilməməsindədir. Otağın həddindən artıq soyudulması, kondisionerin birbaşa uşağa yönəldilməsi və küçə ilə otaq arasındakı kəskin temperatur fərqi - bunların hər biri üst tənəffüs yollarının selikli qişasını qıcıqlandırır və orqanizmin müdafiəsini zəiflədir. Soyuq və quru hava bronxlar üçün ciddi stress mənbəyidir”.
Onun sözlərinə görə, digər səbəblərdən biri də yay viruslarıdır.
“Əsas səbəblərdən biri də yay viruslarıdır. Çoxları bilmir ki, rhinovirus, adenovirus və enteroviruslar il boyu aktiv olur. Xüsusilə enteroviruslar - məhz yay-payız aylarında pik aktivlik göstərir. Bu viruslar uşaq kollektivlərində, hovuzlarda, oyun meydançalarında çox sürətlə yayılır.
Həkim vurğulayıb ki, hovuz suyu və qulaq-burun bağlantısı, gecə yuxusunun pozulması, çox soyuq içkilər də müəyyən qədər xəstəliklərə səbəb olur.
“Hovuzda üzmək uşaqlar üçün böyük zövqdür, amma eyni zamanda risk mənbəyidir. Xlorlu su burun selikli qişasını qıcıqlandırır, qulaq kanalına dolur və orta otit ehtimalını artırır. Uzun müddət islanmış qalmaq isə ümumi bədən müqavimətini aşağı salır”.
“Yay günlərinin uzun olması, gec qaranlıq düşməsi, küçə səs-küyü - bunlar uşağın yuxu rejimini pozur. Yuxusuzluq isə immun sistemini zəiflədir. Qısa müddətdə belə yuxu çatışmazlığı sitokin istehsalını azaldır və infeksiyalara qarşı müqaviməti zəiflədir”.
“Dondurmalar, buzlu şirələr, soyuq içkilər - yayın ayrılmaz hissəsidir. Lakin həddindən artıq soyuq qida qırtlağın yerli müdafiəsini müvəqqəti olaraq zəiflədir. Bu, xüsusilə onsuz da atopik meylliyi olan uşaqlarda simptomların yaranmasını sürətləndirir”.
Nə etmək lazımdır?
Kondisioneri 22–24°C-də saxlayın, birbaşa hava axınından qaçın. Hovuzdan çıxandan dərhal paltar geydirin. Yuxu rejiminə yay aylarında da riayət edin. Və ən əsası - ilk simptomda uşaq həkiminə müraciət edin, özünüzü “keçər” ümidiylə aldatmayın.