Azərbaycan Respublikası Gənclər Fondunun dəstəyi ilə reallaşdırılan "Səyyar Gənclər Xidməti" layihəsi 6–10 iyul tarixlərində Qəbələ rayonunda fəaliyyət göstərir.
"Tehsil365" xəbər verir ki, Azərbaycan Respublikası Gənclər Fondunun dəstəyi ilə reallaşdırılan "Səyyar Gənclər Xidməti" layihəsi çərçivəsində növbəti tədbir Qəbələ rayonunda baş tutub. 6–10 iyul tarixlərini əhatə edən layihə gənclərə müxtəlif istiqamətlər üzrə xidmətlər təqdim edir.
"Gənclərlə, gənclər üçün" devizi altında təşkil olunan layihənin 6 iyul tarixində keçirilən açılış mərasimi Dövlət Himninin səsləndirilməsi və şəhidlərimizin xatirəsinin bir dəqiqəlik sükutla yad edilməsi ilə başlayıb. Tədbirdə çıxış edən rəsmi şəxslər layihənin region gənclərinin bilik və bacarıqlarının inkişafına, onların karyera və şəxsi inkişaf perspektivlərinin genişləndirilməsinə, habelə sosial fəallıqlarının təşviqinə verdiyi töhfələrdən bəhs ediblər.
Layihə çərçivəsində gənclər üçün yaradılmış "Vətənpərvərlik", "Təhsil və karyera", "Rəqəmsal düşüncə", "Fiziki aktivlik və sağlamlıq", "Yaradıcı gənclik" və "Əyləncə" zonaları iştirakçıların böyük marağına səbəb olub. Gənclər zonalarda təşkil olunan vörkşoplar, ustad dərsləri, viktorinalar və intellektual yarışlarda fəal iştirak edərək həm yeni biliklər əldə edib, həm də praktiki bacarıqlarını inkişaf etdiriblər.
Eyni zamanda, Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyası tərəfindən maarifləndirici sessiyalar təşkil olunub. Peşəkar mütəxəssislərin təqdimatında keçirilən təlimlər zamanı iştirakçılar ixtisas seçimi, karyera planlaşdırılması, süni intellekt texnologiyalarının yaratdığı yeni imkanlar və sağlam həyat tərzi mövzularında interaktiv müzakirələrdə iştirak ediblər.
Günün sonunda fəaliyyətlərdə yüksək fəallıq nümayiş etdirən gənclər müxtəlif həvəsləndirici hədiyyələrlə mükafatlandırılıblar.
Qeyd edək ki, ümumilikdə 20 şəhər və rayonu əhatə edəcək və noyabr ayınadək davam edəcək layihə Gənclər Fondunun dəstəyi, Gənclərin İnkişaf və Karyera Mərkəzi və "Gənc Könüllülər" İctimai Birliyinin birgə təşkilatçılığı ilə həyata keçirilir.
