2026-cı il futbol üzrə dünya çempionatının 1/8 final mərhələsində Argentina və Misir milli komandaları arasında keçirilən oyun başa çatıb. Qarşılaşma ABŞ-nin Atlanta şəhərində yerləşən "Mercedes-Benz Stadium"da baş tutub. Matçın baş hakimi Fransadan olan Fransua Leteksye olub. Görüş Argentina millisinin 3:2 hesablı qələbəsi ilə yekunlaşıb.
“Tehsil 365”xəbər verir ki, Oyunda hesabı 15-ci dəqiqədə Misir millisinin müdafiəçisi Yasir İbrahim açıb. Argentinanın hücumçusu Lionel Messi 21-ci dəqiqədə misirli hücumçu Həssəm Həsənin müdafiəçi Nikolas Talyafikoya qarşı kobud oyunu nəticəsində təyin olunan penaltini qola çevirə bilməyib. Hakim 58-ci dəqiqədə VAR baxışından sonra Misirin hücumçusu Mostafa Zikonun qolunu hücum zamanı Lisandro Martinesin ayağına basdığı üçün ləğv edib. Lakin Ziko 67-ci dəqiqədə qaydalar çərçivəsində qol vuraraq komandasının üstünlüyünü iki topa çatdırıb. Argentinanın müdafiəçisi Kristian Romero 79-cu dəqiqədə hesab arasındakı fərqi azaldıb, Lionel Messi isə 84-cü dəqiqədə hesabı bərabərləşdirib. Əlavə vaxtın 90+3-cü dəqiqəsində yarımmüdafiəçi Enso Fernandes qalibiyyət qolunu vuraraq Argentinaya 3:2 hesablı qələbə qazandırıb.
Argentina millisi 1/4 finalda İsveçrə – Kolumbiya cütünün qalibi ilə qarşılaşacaq.
2026-cı il futbol üzrə dünya çempionatı iyunun 11-dən iyulun 19-dək ABŞ, Kanada və Meksikada keçirilir. Turnirin son dünya çempionu Argentina millisidir. Argentina yığması 2022-ci il dünya çempionatının finalında Fransa millisi ilə qarşılaşıb. Oyunun əsas vaxtı 3:3 hesabı ilə başa çatsa da, penaltilər seriyasında Argentina 4:2 hesabı ilə qalib gələrək dünya çempionu olub.