Odlar Yurdu Universitetində MBA proqramı üzrə müxtəlif ixtisaslaşmalar üzrə təhsil alan magistrantların yekun dövlət imtahanı yazılı formada keçirilib.
OYU-dan “Tehsil365” ə bildirilib ki, yekun dövlət imtahanı Azərbaycan Respublikasının ali təhsil müəssisələrində qüvvədə olan normativ tələblərə uyğun şəkildə təşkil olunub. İmtahan zamanı magistrantlar təhsil müddətində əldə etdikləri nəzəri bilik və peşə kompetensiyalarını nümayiş etdirərək ixtisasları üzrə təqdim olunan yazılı tapşırıqları yerinə yetiriblər.
İmtahan prosesi şəffaflıq və obyektivlik prinsipləri əsasında təşkil edilib. Yekun dövlət imtahanının keçirilməsində əsas məqsəd magistrantların təhsil müddətində qazandıqları bilik və bacarıqların qiymətləndirilməsi, onların peşə hazırlığı səviyyəsinin müəyyənləşdirilməsi olub. Yekun dövlət imtahanı "İqtisadiyyat və iqtisadi münasibətlər" kafedrasının müdiri, iqtisad elmləri doktoru, professor Elşad Məmmədovun sədrliyi ilə fəaliyyət göstərən Dövlət Attestasiya Komissiyası tərəfindən keçirilib.
Komissiyanın tərkibinə "İqtisadiyyat və iqtisadi münasibətlər" kafedrasının müəllimi Sevinc Məmmədova, "İqtisadiyyat və iqtisadi münasibətlər" kafedrasının müəllimi, i.f.d. Ayşən Vəlibəyli, "İqtisadiyyat və iqtisadi münasibətlər" kafedrasının müəllimi Alsan Əzimzadə, "İqtisadiyyat və iqtisadi münasibətlər" kafedrasının müəllimi Nigar İbrahimova, Bakı Avrasiya Universitetinin "İqtisadiyyat" kafedrasının dosenti, iqtisad üzrə fəlsəfə doktoru Vüsalə Nağıyeva daxil olublar. Komissiyanın katibi vəzifəsini Odlar Yurdu Universitetinin Diplom şöbəsinin müdiri Aynurə Əhmədova icra edib. Komissiya üzvləri magistrantların yazılı cavablarını mövcud qiymətləndirmə meyarlarına uyğun olaraq dəyərləndiriblər.
Qeyd edək ki, yekun dövlət imtahanı magistratura təhsilinin mühüm mərhələlərindən biri olmaqla, magistrantların ixtisas hazırlığı səviyyəsinin qiymətləndirilməsi və gələcək peşə fəaliyyətinə hazırlığının müəyyənləşdirilməsi baxımından xüsusi əhəmiyyət daşıyır. Odlar Yurdu Universiteti müasir təhsil standartlarına uyğun olaraq yüksək ixtisaslı, rəqabətqabiliyyətli mütəxəssislərin hazırlanması istiqamətində fəaliyyətini uğurla davam etdirir.