“İnsanın özünəinamı və psixoloji dayanıqlılığı, dünyanı necə görməsi ilk növbədə ailədə formalaşır”
Bu fikirləri Rövşən Abdullaoğlu “Tehsil365”ə açıqlamasında bildirib.
Müasir dövrdə cəmiyyət sürətlə dəyişir və bu dəyişikliklər ən çox ailə institutunda özünü göstərir. Texnologiyanın inkişafı, həyat tempinin sürətlənməsi və insanların fərdi maraqlara, komforta daha çox üstünlük verməsi ailədaxili münasibətlərə də təsirsiz ötüşmür. Əgər əvvəllər ailə üzvləri arasında daha sıx ünsiyyət, qarşılıqlı anlayış və mənəvi bağlılıq mövcud idisə, bu gün həmin bağların xeyli zəiflədiyini müşahidə edirik.
Bir evdə yaşayan insanlar bəzən eyni masa arxasında otursalar da, hər biri öz telefonuna və ya kompüterinə baxırlar. Belə olduqda ailə daxilində emosional yaxınlıq azalır, münasibətlərdə soyuqluq və anlaşılmazlıqlar yaranır. Halbuki sağlam ailə yalnız birlikdə yaşamaq deyil, bir-birini dinləmək, anlamaq və çətin anlarda dəstək olmaq, bir-birlərinin daxili aləmlərindən agah olmaq deməkdir.
Ailədə baş verən bu dəyişikliklər gənclərin həyata baxışına da təsir göstərir. Bu günün gəncləri uğur üçün böyük imkanlara sahib olsalar da, eyni zamanda tez ruhdan düşür, özlərinə inamları azalıb, bəziləri zəhmət çəkmədən uğur əldə etmək istəyirlər. Buna baxmayaraq, təhsil alan, öz üzərində çalışan və mənəvi dəyərlərinə sadiq qalan çox aktiv gənclər də görürəm. Ancaq bunların sayı digərlərinə baxanda daha azdır.
Psixoloqlar hesab edirlər ki, insanın özünəinamı və psixoloji dayanıqlılığı, dünyanı necə görməsi ilk növbədə ailədə formalaşır. Sevgi, hörmət və qarşılıqlı etibar üzərində qurulan ailə gənclərin sağlam şəxsiyyət kimi yetişməsində mühüm rol oynayır. Belə gənclər dünyanı təhlükə yeri kimi deyil, inkişaf üçün fürsətlər yeri kimi görürlər.