Gəncə Dövlət Milli Dram Teatrı özünün 130-cu yubiley teatr mövsümünü iyulun 17-də Abdulla Elşadlının tərcümə və səhnələşdirməsi əsasında hazırlanmış “Zəhri-Mar” tamaşası ilə bağlayacaq.
Teatrdan “Tehsil365"ə verilən məlumata görə, 130-cu teatr mövsümü ərzində bir-birindən maraqlı səhnə əsərləri ilə tamaşaçıların görüşünə gələn sənət ocağının kollektivi mövsümün son tamaşasında cəmiyyət üçün olduqca aktual mövzulardan birinə müraciət edir. Dərin psixoloji xəttə malik olan “Zəhri-Mar” tamaşası narkomaniya bəlasının ailələrə, insan talelərinə və bütövlükdə cəmiyyətə vurduğu mənəvi zərbələri bədii-estetik vasitələrlə tamaşaçıya çatdırır.
Səhnə əsərinin quruluşçu rejissoru Abdulla Elşadlı, rejissoru Şahmar Məmmədov, quruluşçu rəssamı Mirzə Mehdi Hüseynov, musiqi tərtibatçısı Şəms Elşadlıdır. Tamaşada əsas obrazları Əməkdar artist Novruz Cəfərov, eləcə də aktyorlar Zülfiyyə Əliyeva, Şahmar Məmmədov, Aysu Kəngərli, Ruslan Hüseynov və Elmir Məmmədov canlandırırlar.
“Zəhri-Mar” təkcə bir ailənin faciəsindən bəhs etmir. Tamaşa insanın yanlış seçimlərinin doğurduğu ağır nəticələri, ailə dəyərlərinin sarsılmasını, mənəvi aşınmanı və cəmiyyətin qarşısında duran təhlükələri təsirli səhnə dili ilə təqdim edir. Emosional gərginliyi və psixoloji dərinliyi ilə seçilən tamaşa hər bir tamaşaçını düşündürməyi və ictimai məsuliyyət hissini gücləndirməyi hədəfləyir.
130-cu teatr mövsümü ərzində Gəncə Dövlət Milli Dram Teatrı klassik və müasir dramaturgiyanın uğurlu nümunələrini səhnələşdirərək repertuarını daha da zənginləşdirib, yeni layihələr, premyeralar və beynəlxalq əməkdaşlıqlarla teatrsevərlərin diqqət mərkəzində olub. Yubiley mövsümünün bağlanışı da məhz sosial əhəmiyyət daşıyan, aktual mövzuya toxunan bu səhnə əsəri ilə yadda qalacaq.