Ali və orta ixtisas təhsili müəssisələrində təhsil alan tələbələrin yerdəyişməsi üzrə elektron müraciətlərin qəbulu 13 iyul saat 10:00-da başlayacaq və 19 iyul saat 18:00-dək davam edəcək.
"Tehsil365" xəbər verir ki, yerdəyişmə prosesi portal.edu.az üzərindən elektron qaydada həyata keçiriləcək.
Qaydalara əsasən, ali və orta ixtisas təhsili müəssisələrində normativ təhsil müddətində oxuyan, həmçinin təhsil proqramı üzrə həmin dövr üçün müəyyən olunmuş kreditlərin ən azı yarısını toplayan tələbələr yerdəyişmə üçün müraciət edə bilərlər.
Bakalavriat səviyyəsində təhsil alan tələbənin təhsil müəssisəsini, ixtisasını və ya təhsilalma formasını dəyişməsi üçün onun qəbul imtahanında topladığı bal qəbul olunduğu ildə köçmək istədiyi ixtisas üzrə minimal keçid balından yüksək olmalıdır. İxtisas dəyişikliyi yalnız eyni ixtisas qrupu daxilində mümkündür.
Subbakalavr kimi müsabiqədənkənar qaydada ali məktəbə qəbul olunan tələbələrin isə təhsil müəssisəsini, ixtisasını və təhsilalma formasını dəyişməsinə icazə verilmir.
Magistratura səviyyəsində təhsil alan tələbələr yalnız təhsil müəssisəsini dəyişə bilərlər. Bu zaman onların qəbul balı köçmək istədikləri universitet üzrə minimal keçid balından yüksək olmalıdır. Magistratura pilləsində ixtisasın dəyişdirilməsinə icazə verilmir.
Qaydalara görə, təhsil proqramı üzrə tələb olunan kreditlərin yarısından azını toplayan, eləcə də normativ təhsil müddətini başa vurmuş tələbələrin yerdəyişməsinə yol verilmir.
Dövlət sifarişi əsasında təhsil alan tələbələr isə bəzi istisnalar nəzərə alınmaqla, yerdəyişmədən sonra təhsillərini ödənişli əsaslarla davam etdirəcəklər.
Xarici ali təhsil müəssisələrindən Azərbaycan universitetlərinə köçürülmə zamanı beynəlxalq qəbul imtahanlarının nəticələri və ya universitetin beynəlxalq reytinqlərdə ilk 500-lükdə yer alması əsas meyarlardan biri kimi nəzərə alınacaq.
Qeyd edək ki, tələbələrin yerdəyişməsi ilə bağlı bütün müraciətlər yay tətili dövründə portal.edu.az üzərindən elektron qaydada qəbul olunacaq.