İyulun 8-də Azərbaycan Dillər Universitetinin (ADU) Dünya ədəbiyyatı və nəzəriyyəsi kafedrasının, Filologiya fakültəsinin və Magistratura şöbəsinin birgə təşkilatçılığı ilə "Əmək bazarı" mövzusunda görüş keçirilib.
ADU-dan “Tehsil365” ə bildirilib ki, Görüşün əsas məqsədi bakalavr və magistratura səviyyəsində təhsil alan tələbələrin əmək bazarının müasir tələbləri barədə məlumatlandırılması, onların peşə hazırlığının gücləndirilməsi, karyera imkanlarının genişləndirilməsi, eləcə də ali təhsil müəssisələri ilə elmi-təhsil qurumları arasında əməkdaşlığın inkişaf etdirilməsi olub.
Tədbiri giriş sözü ilə Dünya ədəbiyyatı və nəzəriyyəsi kafedrasının müdiri, filologiya elmləri doktoru, professor Şahin Xəlilli açaraq iştirakçıları salamlayıb, belə görüşlərin tələbələrin gələcək peşəkar fəaliyyətində mühüm əhəmiyyət daşıdığını vurğulayıb. Daha sonra ADU-nun Elm və innovasiya məsələləri üzrə prorektoru, filologiya elmləri doktoru, professor Həmidə Əliyeva çıxış edərək müasir əmək bazarının ali təhsil qarşısında qoyduğu tələblərdən, elmi biliklərin praktik bacarıqlarla uzlaşdırılmasının vacibliyindən, həmçinin gənc mütəxəssislərin rəqabətqabiliyyətliliyinin artırılması istiqamətində universitetdə həyata keçirilən fəaliyyətlərdən bəhs edib.
Görüşdə Dünya ədəbiyyatı və nəzəriyyəsi kafedrasının dosenti, filologiya üzrə fəlsəfə doktoru Gilə Hüseynli filologiya ixtisası üzrə təhsil alan tələbələrin peşə perspektivləri, əmək bazarında uğur qazanmaq üçün zəruri kompetensiyalar və akademik hazırlığın əhəmiyyəti barədə fikirlərini bölüşüb.
Görüş Bakı Avrasiya Universitetinin Azərbaycan və Dünya ədəbiyyatı kafedrasının müdiri, filologiya üzrə fəlsəfə doktoru, dosent Elmira Kekeçin, Azərbaycan Milli Elmlər Akademiyasının Nizami Gəncəvi adına Ədəbiyyat İnstitutunun Dünya ədəbiyyatı və komparativistika şöbəsinin müdiri, filologiya elmləri doktoru, professor Gülər Abdullabəyovanın, tarix üzrə fəlsəfə doktoru, dosent Namiq Əsədovun və ADU-nun Əlavə təhsil, təcrübə və karyera şöbəsinin müdiri Nicat Aşurovun çıxışları ilə davam edib.
Çıxışlarda müasir əmək bazarında filoloqlar üçün mövcud imkanlar, işəgötürənlərin gözləntiləri, karyera planlaşdırılması, təcrübə proqramlarının əhəmiyyəti, eləcə də gənclərin peşəkar inkişafına dəstək verən mexanizmlər barədə ətraflı məlumat verilib. Eyni zamanda, ali təhsil müəssisələri ilə elmi müəssisələr arasında əməkdaşlığın genişləndirilməsinin və tələbələrin əmək bazarına daha hazırlıqlı şəkildə inteqrasiyasının vacibliyi xüsusi vurğulanıb.
Görüş interaktiv müzakirələrlə davam edib, tələbələri maraqlandıran suallar cavablandırılıb, gələcək əməkdaşlıq istiqamətləri ətrafında fikir mübadiləsi aparılıb.