İyulun 8-də Abşeron-Xızı Regional Təhsil İdarəsi ilə Sumqayıt Dövlət Universiteti (SDU) arasında əməkdaşlıq çərçivəsində idarənin inzibati binasında “Süni intellektin istifadəsində yeniliklər və istifadə formaları” mövzusunda təlim təşkil olunub.
SDU-dan “Tehsil365” ə bildirilib ki, təlimdə Abşeron-Xızı Regional Təhsil İdarəsinin müdiri İlhamə Abdullayeva, sektor müdirləri və idarənin əməkdaşları, həmçinin Sumqayıt Dövlət Universitetinin İctimaiyyətlə əlaqələr şöbəsinin müdiri Aytən Rəhimova və Mühəndislik fakültəsinin dekanı, dosent Ulduz Ağayev iştirak edib.
İnnovasiya üzrə ekspert Ramin Əkbərov tərəfindən aparılan təlimdə süni intellekt alətlərinin müasir imkanları, sənədlərin hazırlanması, məlumatların təhlili, təqdimatların hazırlanması, planlaşdırma və digər inzibati proseslərdə tətbiqi, eləcə də təhlükəsiz və etik istifadə prinsipləri barədə ətraflı məlumat verilib.
Tədbir çərçivəsində praktik nümunələr təqdim olunub, iştirakçıların sualları cavablandırılıb və qarşılıqlı fikir mübadiləsi aparılıb.
Sonda Abşeron-Xızı Regional Təhsil İdarəsi ilə Sumqayıt Dövlət Universiteti arasında əməkdaşlığın gələcəkdə də təhsil sahəsində innovativ yanaşmaların tətbiqinə, rəqəmsal transformasiya istiqamətində bilik və bacarıqların inkişafına töhfə verəcək birgə fəaliyyətlərlə davam etdiriləcəyi vurğulanıb.