Milli Müdafiə Universitetinin (MMU) tabeliyində fəaliyyət göstərən Heydər Əliyev adına Hərbi İnstitutda “Ehtiyat zabit hazırlığı kursu”nun növbəti buraxılış mərasimi keçirilib.
Müdafiə Nazirliyindən “Tehsil365”ə verilən məlumata görə, əvvəlcə MMU-nun rəhbərliyi institutun həyətində ucaldılan Ulu Öndər Heydər Əliyevin büstü önünə və şəhidlərin xatirə kompleksinə gül dəstələri qoyub, öz ehtiramlarını nümayiş etdiriblər.
Zabit və müəllim heyətinin iştirakı ilə davam edən tədbirdə xalqımızın Ümummilli Lideri Heydər Əliyevin və Vətən uğrunda canlarından keçən şəhidlərin xatirəsi bir dəqiqəlik sükutla yad olunub. Azərbaycan Respublikasının Dövlət Himni səsləndirilib.
Tədbirdə çıxış edən MMU-nun rektoru general-mayor Gündüz Əbdülov məzunları təbrik edərək onlara təqdim olunan “leytenant” hərbi rütbəsi təkcə fərqlənmə nişanı deyil, eyni zamanda, Vətən qarşısında böyük məsuliyyətin, zabit şərəfinin, liderlik keyfiyyətlərinin və hərbi anda sədaqətin rəmzi olduğunu bildirib.
Rektor vurğulayıb ki, məzunlar bu gündən etibarən Azərbaycan Ordusunun zabit heyətinin sıralarına qoşularaq dövlətin və xalqın yüksək etimadını doğrultmalı, xidmətdə peşəkarlıq, yüksək intizam və vətənpərvərlik nümunəsi göstərməlidirlər.
Göstərilən diqqət və qayğıya görə Azərbaycan Prezidentinə və Müdafiə Nazirliyinin rəhbərliyinə minnətdarlıqlarını bildirən gənc zabitlər Vətənə, dövlətə və xalqa layiqincə xidmət edəcəklərinə söz veriblər.
Kurs birincisi leytenant Məhəmməd Həsənov tərəfindən rəmzi yaş kötüyünə emblem vurulduqdan sonra məzunlara sertifikatlar təqdim edilib.
Buraxılış mərasimi xatirə fotosunun çəkdirilməsi ilə başa çatıb.
