Müasir dövrdə bəzi uşaqlarda böyüklərə qarşı aqressiv davranışların artması tək bir səbəblə izah oluna bilməz. Bu, ailə, məktəb, sosial mühit və rəqəmsal dünyanın təsiri ilə formalaşan kompleks bir məsələdir.
Bu sözləri “Tehsil365”ə açıqlamasında psixoloq Zeynəb Əyyubova bildirib.
Psixoloq bildirib ki, bu hal ailə, məktəb, sosial mühit və rəqəmsal dünyanın təsiri ilə formalaşan kompleks məsələdir.
“Bu, ailə, məktəb, sosial mühit və rəqəmsal dünyanın təsiri ilə formalaşan kompleks bir məsələdir. İlk növbədə, uşaqlar davranışları müşahidə edərək öyrənirlər. Ailədə tez-tez qışqırıq, təhqir, fiziki və ya emosional zorakılıq müşahidə olunursa, uşaq aqressiyanı ünsiyyət vasitəsi kimi qəbul edə bilər. Digər tərəfdən, uşağın hiss və ehtiyaclarının dinlənilməməsi, daim tənqid olunması və ya əksinə, heç bir sərhəd qoyulmadan böyüdülməsi də aqressiv davranışlara zəmin yarada bilər”.
Onun sözlərinə görə, rəqəmsal mühitin də təsiri nəzərə alınmalıdır.
“Rəqəmsal mühitin də təsiri nəzərə alınmalıdır. Sosial media, kompüter oyunları və müxtəlif vizual məzmunlar uşaqların davranış modellərinə təsir edir. Lakin aqressiyanın səbəbini yalnız texnologiya ilə əlaqələndirmək düzgün olmaz. Əsas məsələ uşağın həmin məzmunu necə qəbul etməsi, ailənin nəzarəti və valideyn-övlad münasibətlərinin keyfiyyətidir. Bundan əlavə, bəzi uşaqlar yaşadıqları stres, narahatlıq, diqqət ehtiyacı və ya emosional çətinlikləri sözlə ifadə edə bilmədikləri üçün bunu aqressiv davranışlarla göstərirlər. Yəni aqressiya bəzən problemin özü deyil, daxildə yaşanan çətinliyin əlamətidir.
Psixoloq vurğulayıb ki, bu problemin həlli üçün valideynlər ilk növbədə uşağı dinləməyi, hisslərini anlamağı və sağlam sərhədlər qoymağı bacarmalıdırlar.
“Bu problemin həlli üçün valideynlər ilk növbədə uşağı dinləməyi, hisslərini anlamağı və sağlam sərhədlər qoymağı bacarmalıdırlar. Məktəb və ailə arasında əməkdaşlıq gücləndirilməli, uşaqlara emosiyalarını sağlam şəkildə ifadə etməyi öyrədən yanaşmalar tətbiq olunmalıdır. Zərurət yarandıqda isə psixoloq dəstəyinə müraciət etmək vacibdir. Unutmamalıyıq ki, aqressiv davranış göstərən hər uşaq “tərbiyəsiz” deyil. Çox vaxt bu davranış onun daxili gərginliyinin, emosional ehtiyaclarının və ya düzgün ifadə edə bilmədiyi çətinliklərin göstəricisidir. Problemin kökünə enmək və uşağa anlayışla yanaşmaq uzunmüddətli müsbət nəticələrin əldə olunmasına kömək edir”.