Müəllimlərin işə qəbulu (MİQ) üzrə müsabiqədə iştirak etmək üçün qeydiyyatdan keçən namizədlərin sayı 40 mini keçib.
“Tehsil365” xəbər verir ki, bu barədə Məktəbəqədər və Ümumi Təhsil üzrə Dövlət Agentliyinin İmtahan və qiymətləndirmə şöbəsinin müdiri Nurlan İsmayılbəyli Təhsil TV-də yayımlanan "Təhsil dialoqu" verilişində məlumat verib.
Onun sözlərinə görə, hazırda namizədlərin elektron ərizələrində təqdim etdikləri məlumatların emalı aparılır və bu prosesin yaxın günlərdə başa çatdırılması nəzərdə tutulur.
Nurlan İsmayılbəyli bildirib ki, son illərdə elektron imtahan infrastrukturu əhəmiyyətli dərəcədə gücləndirilib. Belə ki, 2022-ci ildə eyni vaxtda 5 min namizəd imtahana qoşula bildiyi halda, bu il bu göstərici 11 minə çatdırılıb. İmtahanların ölkənin 23 şəhərində yerləşən 56 mərkəzdə keçirilməsi üçün zəruri şərait yaradılıb.
Şöbə müdiri əlavə edib ki, MİQ-də ən yüksək rəqabət Azərbaycan dili və ədəbiyyatı, ibtidai sinif və xarici dillər üzrə müşahidə olunur. Onun sözlərinə görə, son illərdə Azərbaycan dili və ədəbiyyatı müəllimliyi üzrə hətta ucqar ərazilərə qəbul olunan namizədlərin əksəriyyəti 75–80 faiz nəticə göstərib və bu il də həmin fənlər üzrə yüksək rəqabətin olacağı gözlənilir.