Bakı Mühəndislik Universitetinin (BMU) 2026/2027-ci tədris ili üçün magistratura səviyyəsində qəbul planı təsdiqlənib.
"Tehsil365" xəbər verir ki, cari tədris ilində magistratura üzrə ixtisasların sayı ötən illə müqayisədə 25-dən 28-ə, ixtisaslaşmaların sayı isə 38-dən 47-yə çatdırılıb.
Qəbul planına əsasən:
İxtisas və ixtisaslaşmalar üzrə ayrılan 483 yerdən 420-si Azərbaycan, 63-ü isə ingilis bölməsinin payına düşür.
BMU-nun MBA proqramı üzrə 8 ixtisaslaşma üçün 175 yer planlaşdırılıb. Bu yerlərin 160-ı Azərbaycan, 15-i isə ingilis bölməsi üçün nəzərdə tutulub.
Yeni ixtisas və ixtisaslaşmalar
Universitetin təklif etdiyi proqramlar siyahısına yeni ixtisaslar və ixtisaslaşmalar daxil edilib:
Yeni ixtisaslar: "Kompüter elmləri" (Süni intellekt, Tətbiqi riyaziyyat), "Fizika" (Tətbiqi fizika - yarımkeçiricilər və dielektriklər fizikası), "Dekorativ tətbiqi sənət" (Bədii keramika və şüşə).
Yeni ixtisaslaşmalar: "Maliyyə nəzarəti və audit", "Maliyyə mühəndisliyi", "Dəmir-beton konstruksiyaları", "Radiorabitə, radioverilişlər və televiziya", "Mühəndislikdə idarəetmə".
BMU və Çin universitetindən "ikiqat diplom" yeniliyi
Daha bir mühüm yenilik isə BMU ilə Çin Xalq Respublikasının Pekin İnşaat və Memarlıq Universiteti (BUCEA) arasında həyata keçirilən magistratura səviyyəsində ikili diplom proqramıdır.
Proqram 4 ixtisaslaşma üzrə iki model əsasında reallaşdırılacaq:
1. "İnformasiya texnologiyaları" ixtisası (2 ixtisaslaşma: İdarəetmədə informasiya sistemləri, Maşın öyrənməsi);
2. "Memarlıq" ixtisası (1 ixtisaslaşma: Memarlıq mühitinin dizaynı);
3. "Mexanika mühəndisliyi" ixtisası (1 ixtisaslaşma: Hidromexanika və hidravlik maşınlar).
Qəbul olan magistrantlar təhsilin ilkin mərhələsini BMU-da, sonrakı mərhələsini isə BUCEA-da davam etdirəcəklər. Çində təhsil aldıqları müddətdə tələbələr BUCEA tərəfindən ayrılan təqaüd imkanlarından yararlanmaq şansı əldə edirlər. BUCEA-da təhsilini davam etdirmək istəməyən magistrantlar isə təhsillərini mövcud qaydalar və müvafiq akademik tələblər çərçivəsində BMU-da tamamlaya bilərlər.