Magistratura imtahanında 50 və daha çox bal toplayan bakalavrlar ixtisaslarından asılı olmayaraq, iyulun 10-u saat 15:00-dək DİM-in saytında qeydiyyatdan keçməklə jurnalistika ixtisaslaşmalarına müraciət edə bilərlər. İyulun 15-dən etibarən keçiriləcək 40 AZN dəyərindəki ödənişli qabiliyyət imtahanında bakalavrların jurnalistika sahəsindəki yazıları nəzərdən keçiriləcək, həmçinin şifahi müsahibə və yazılı tapşırıqlar vasitəsilə onların bilik və bacarıqları qiymətləndiriləcək.
“Tehsil365” xəbər verir ki, cari ildə ali təhsil müəssisələrinin magistratura səviyyəsinə qəbul imtahanında 50 və daha çox bal toplayan bakalavrlar, ixtisasından asılı olmayaraq, jurnalistika ixtisaslaşmalarına müraciət edə bilərlər.
Qeydiyyat prosesi:
Jurnalistika ixtisaslaşmalarına qəbul olmaq istəyən bakalavrlar 6-10 iyul (saat 15:00-dək) tarixlərində DİM-in internet saytındakı müvafiq sorğu anketini dolduraraq qeydiyyatdan keçməlidirlər.
İdman jurnalistikası (tədris ingilis dilində) ixtisasını seçmək istəyənlər üçün minimum 50 baldan əlavə, ingilis dili üzrə nəticənin 20 baldan az olmaması tələb olunur.
Qeydiyyat zamanı bakalavrlar jurnalistika janrları üzrə 2-3 ədəd yazılarının skan edilmiş surətini və media subyekti tərəfindən verilmiş arayışı elektron poçt ünvanına göndərməlidirlər.
Qabiliyyət imtahanı:
Qabiliyyət imtahanının iyulun 15-dən etibarən keçirilməsi nəzərdə tutulur.
Bakalavrlar iyulun 14-dən etibarən "Bakalavrın qabiliyyət imtahanına buraxılış vərəqəsi"ni çap edib götürməlidirlər.
Qabiliyyət imtahanında iştirak ödənişlidir və məbləğ 40 AZN təşkil edir.
İmtahan zamanı hər bir bakalavra təxminən 30 dəqiqə vaxt ayrılır. İmtahanın quruluşu bakalavrın jurnalistika sahəsindəki yazılarına baxış, şifahi müsahibə və yazılı tapşırıqları (təhlil, redaktə, əməli yazı) əhatə edir. Komissiya üzvləri bakalavrın ümumi dünyagörüşünü, jurnalistikaya marağını, nəzəri biliklərini və yaradıcı təfəkkürünü yoxlamaq üçün suallar verə bilərlər.
Qeyd olunan sənədlərdən biri olmayan və ya uyğunsuzluq aşkar olunan namizədlər imtahana buraxılmır.