Kirayə ev bazarında tələbələri hədəf alan dələduzluq hallarının sayı artır. Bu dəfə "bina.az" saytında yerləşdirilən elanla maraqlanan tələbə qızlar ciddi problemlə üzləşiblər.
“Tehsil365” xəbər verir ki, tələbələr münasib şərtlərlə bağ evi kirayələmək üçün elan sahibi ilə əlaqə saxlayıblar. Özünü əmlakçı kimi təqdim edən şəxs, evin "bron" edilməsi adı ilə tələbələrdən 50 manat ön ödəniş və şəxsiyyət vəsiqələrinin surətini tələb edib.
"Bizi hədələdi, təhqir etdi, sonda isə blokladı"
Aldadılan tələbələrdən biri yaşadığı xoşagəlməz hadisəni belə nəql edir:
"Bizdən öncə pul, sonra isə şəxsiyyət vəsiqəmizin şəklini istədi. Pul köçürüləndən sonra daha da irəli gedərək bizi hədələməyə, təhqir etməyə başladı. Sonda isə nə zənglərə cavab verdi, nə də mesajlara. Bütün nömrələrimizi bloklayaraq ortadan yoxa çıxdı."
Ekspertlər xəbərdarlıq edir: "Evi görmədən ödəniş etməyin!"
Məsələ ilə bağlı münasibət bildirən kibertəhlükəsizlik üzrə ekspert Vüsal Məmmədzadə qeyd edib ki, əmlak saytlarında qeydiyyatdan keçən şəxslərin identifikasiyasının zəif olması dələduzlar üçün şərait yaradır:
"Tələbələr və digər vətəndaşlar çox diqqətli olmalıdır. Evi öz gözlərinizlə görmədən, müqavilə imzalamadan və qarşı tərəfin etibarlılığına tam əmin olmadan heç bir halda ödəniş etməyin. Şəxsi məlumatlarınızı və sənədlərinizi tanımadığınız şəxslərə göndərmək gələcəkdə daha ciddi problemlərə yol aça bilər."
Qeyd edək ki, ictimailəşən bu faktın ardından tərəflər arasında "razılıq" əldə olunub və dələduz qızlardan aldığı 50 manatı geri qaytarıb. Lakin tələbələr digər tələbə yoldaşlarını da belə hallara qarşı diqqətli olmağa çağırırlar.