Türkiyənin Bayburt şəhərində 30-cu Beynəlxalq Dədə Qorqud Simpoziumu keçirilib.
"Tehsil365" xəbər verir ki, 6–9 iyul 2026-cı il tarixlərində Bayburt Valiliyi, Bayburt Bələdiyyəsi və Bayburt Universitetinin birgə təşkilatçılığı ilə keçirilən simpoziumda Türk dünyasından universitet rektorları, millət vəkilləri və alimlər iştirak ediblər.
Xəzər Universitetinin Tarix və arxeologiya departamentinin müdiri, dosent Telman Nüsrətoğlu da tədbirə qatılaraq "Türk dünyasının mənəvi, siyasi və tarixi birliyinin formalaşmasında böyük tarixi şəxsiyyətlərin rolu" mövzusunda məruzə ilə çıxış edib.
Məruzədə Dədə Qorqud irsinin türk xalqlarını ortaq tarix, mədəniyyət və mənəvi dəyərlər ətrafında birləşdirən rolu vurğulanıb, həmçinin Türk dünyasının siyasi və mənəvi həmrəyliyinin möhkəmlənməsində tarixi şəxsiyyətlərin xidmətləri elmi faktlar əsasında təhlil edilib.
Qeyd edək ki, Beynəlxalq Dədə Qorqud Simpoziumu Türk dünyasının ortaq tarixi, dili, mədəniyyəti və mənəvi irsinin öyrənilməsi və təbliği baxımından nüfuzlu elmi platformalardan biri hesab olunur.