Kanadanın Britaniya Kolumbiyası əyalətində yaşayan 12 yaşlı Mana Campala kiçik bizneslərə gələn telefon zənglərini idarə edən "Voxa" adlı süni intellekt xidməti ərsəyə gətirib.
“Tehsil365” Oxu.az-a istinadən xəbər verir ki, 2025-ci ilin noyabr ayında fəaliyyətə başlayan layihə hazırda yüzlərlə zəngi qəbul edir. Xidmətin yaradıcısı isə yaxın gələcəkdə ilk ödənişli müştərisini qazanmağı hədəfləyir.
Bu ideya Campalanın atasının kiçik şirkətinin işçilərin yüksək iş yükü səbəbindən mütəmadi olaraq daxil olan zəngləri qaçırmasını müşahidə etməsindən sonra yaranıb. Bu, onu gecə-gündüz müştəri müraciətlərini qəbul edə bilən süni intellekt köməkçisi yaratmağa təşviq edib.
"Voxa" xidməti daxil olan zəngləri cavablandırmaq, müştəri qəbullarını təyin etmək, sifarişləri qeydə almaq, buraxılmış zəngləri idarə etmək və hər bir danışığın yekununa dair qısa hesabatlar hazırlamaq imkanına malikdir. Həmçinin, 12 yaşlı ixtiraçı istifadəçilərə mətn əmrləri vasitəsilə fərdi süni intellekt agentləri formalaşdırmağa şərait yaradan "Voxa Agents" platformasını da təqdim edib.
Platformanın yaradılması prosesində Campala "ChatGPT" və "Claude" kimi generativ süni intellekt modellərinə müraciət edib. O, ilkin mərhələdə qısa kod hissələrini yazmaq və test etmək məqsədilə "ChatGPT"dən yararlanıb, daha sonra isə proqramlaşdırma sahəsində daha funksional hesab edilən "Claude" modelinə üstünlük verib. Yeniyetmə qız kod bazasını bütövlükdə generasiya etmək yerinə, sistemi addım-addım quraraq hər bir modulu ayrı-ayrılıqda sınaqdan keçirib.
Məlumata görə, Campalanın süni zəkaya olan həvəsi hələ doqquz yaşında ikən başlayıb. Ötən müddət ərzində o, "Python" proqramlaşdırma dilini mənimsəyib, müxtəlif kodlaşdırma proqramlarına qatılıb, ali məktəblər arasında elmi müsabiqədə xüsusi mükafata layiq görülüb və gənc biznesmenlərə dəstək verən "1517 Medici Project" fondunun qrantını əldə edib.
Hazırlanan məhsulun marketinq prosesi isə müəyyən çətinliklərlə müşayiət olunub. Üzbəüz görüşlərdə potensial alıcılar sistemin funksionallığından ziyadə yaradıcının yaşına diqqət yetiriblər. Bu səbəbdən gənc proqramçı diqqətini onlayn formatda təqdimatlara yönəldib, çünki onun fikrincə, virtual mühitdə əsas diqqət məhsulun üstünlüklərinə və keyfiyyətinə verilir.
Gələcək planlara gəldikdə, Campala startapını ilkin olaraq kənar maliyyə dəstəyi olmadan böyütməyi, daha sonra texnologiyayönümlü şirkətlər üçün nəzərdə tutulan tanınmış akselerator proqramlarının birinə qoşulmağı düşünür. Yalnız bundan sonra o, layihəni daha böyük miqyasda genişləndirmək üçün vençur sərmayələri cəlb etməyi qarşısına məqsəd qoyub.