Qarabağ və Şərqi Zəngəzurda aparılan botaniki ekspedisiyalar mühüm elmi nəticələrlə yadda qalıb. Bəsitçay Dövlət Təbiət Qoruğunda aparılan tədqiqatlar zamanı çaykənarı ərazilərdə və ağacların üzərində altı mamır növü aşkar edilib. Eyni zamanda, bir ağacın üzərində elm üçün yeni olan üç mamır növü müəyyənləşdirilib. Həmin nümunələr molekulyar səviyyədə təsdiqlənməsi üçün xarici laboratoriyalara göndərilib və əldə olunan nəticələr yüksək impakt faktorlu beynəlxalq elmi jurnallarda dərc olunub.
“Tehsil365” bildirir ki, Elm və Təhsil Nazirliyi Botanika İnstitutunun direktoru vəzifəsini icra edən professor Səyyarə İbadullayeva deyib. Professor qeyd edib ki, müharibənin torpaqlarda yaratdığı mənfi təsirlərə, o cümlədən ağır metallarla çirklənmə və yanğın izlərinə baxmayaraq, geofit bitkilər öz həyat qabiliyyətini qoruyub saxlayıb. Torpağın 2-3 metr dərinliyində yerləşən soğanaq və kökümsov orqanlar zərər görmədiyindən bu bitkilər yenidən inkişaf etməyə başlayıb.
Səyyarə İbadullayeva bildirib ki, xarici ekspertlərlə birgə aparılan ekspedisiyalar zamanı Şuşa və Laçın arasında yerləşən dağlıq ərazidə dünyada yalnız həmin regionda rast gəlinən nadir endemik növ – Voronov yoncası (Trifolium voronovii) aşkar edilib. Onun sözlərinə görə, bu kəşf beynəlxalq elmi ictimaiyyət tərəfindən yüksək qiymətləndirilib və Qarabağın zəngin biomüxtəlifliyini bir daha təsdiqləyib.