Azərbaycan Kənd Qadınları Assosiasiyası işğaldan azad olunmuş ərazilərdə qadın sahibkarlığının inkişafında yeni mərhələnin əsasını qoyur. Azərbaycanın işğaldan azad olunmuş ərazilərində iqtisadi dirçəliş və dayanıqlı inkişaf prosesinə növbəti mühüm töhfə verən tarixi təşəbbüs həyata keçirilir. Azərbaycan Kənd Qadınları Assosiasiyası QHT-lərə Dövlət Dəstəyi Agentliyinin maliyyə dəstəyi ilə icra etdiyi "Aqrosahibkar Qadınlarla İş" layihəsi çərçivəsində işğaldan azad edilən ərazilərdə ilk qadın kooperativini Zəngilan rayonunun Ağalı kəndində yaradır. Bununla da assosiasiya regionda qadın sahibkarlığının inkişafında keyfiyyətcə yeni bir mərhələyə start verir.
Azərbaycan Kənd Qadınları Assosiasiyasından “Tehsil365”ə verilən xəbərə görə, bu təşəbbüs təkcə yeni istehsal subyektinin qurulması deyil, həm də regionda qadınların iqtisadi müstəqilliyinin güclənməsinə, kollektiv sahibkarlığın fəal inkişafına və aqrar sektorda müasir əməkdaşlıq modelinin formalaşmasına xidmət edən strateji addımdır.
AKQA-nın rəhbərliyi ilə ərsəyə gələn bu kooperativ Ağalı kəndində məskunlaşan və aqrar sahədə fəaliyyət göstərən qadın sahibkarları vahid platformada birləşdirəcək. Yeni model sayəsində yerli qadınlar bilik, təcrübə, resurs və istehsal imkanlarını sinerji şəklində bir araya gətirərək daha səmərəli fəaliyyət göstərə biləcəklər. Bu isə öz növbəsində istehsal həcminin artırılmasına, rəqabətqabiliyyətli yerli məhsullarla yeni bazarlara çıxış imkanlarının genişləndirilməsinə və ailə gəlirlərinin yüksəldilməsinə zəmin yaradacaq.
Çoxşaxəli fəaliyyət profilinə malik olacaq qadın kooperativi əkinçilik, taxılçılıq, bağçılıq, heyvandarlıq, meyvə-tərəvəz emalı, milli mətbəx, iaşə xidmətləri və aqroturizm kimi kənd təsərrüfatı ilə birbaşa əlaqəli olan sahələrdə çalışan sahibkar qadınları öz çətiri altında birləşdirəcək.
Layihənin mühüm mərhələsi olaraq, iştirakçılar üçün kooperativ idarəçiliyi, biznesin planlaşdırılması, müasir emal texnologiyaları, marketinq və satış strategiyaları, müştəri xidmətləri, həmçinin aqroturizmin təşkili istiqamətlərində xüsusi təlimlər təşkil olunub. Qazanılan müasir bilik və bacarıqlar Ağalı kəndinin iqtisadi potensialının daha səmərəli reallaşdırılmasına, Şərqi Zəngəzurun turizm imkanlarının genişlənməsinə və yerli istehsalın rəqabət gücünün artmasına birbaşa xidmət edəcək
.Bununla da, Ağalı qadınları fərdi təsərrüfatçılıqdan daha mütərəqqi bir mərhələyə – kollektiv sahibkarlığa qədəm qoyurlar. Onlar öz təşəbbüskarlıqları və sarsılmaz əməkdaşlıq ruhu ilə sübut edirlər ki, birlikdə çalışmaq daha böyük uğurlar, daha dayanıqlı biznes mühiti və daha yüksək sosial rifah deməkdir. İşğaldan azad edilən ərazilərdə fəaliyyət göstərəcək ilk rəsmi hüquqi statuslu qadın biznes qurumu olan bu kooperativ, eyni zamanda, bölgədə qadın liderliyinin, iqtisadi həmrəyliyin və sosial məsuliyyətin yeni simvoluna çevrilərək, digər yenidən qurulan yaşayış məntəqələri üçün də uğurlu bir nümunə rolunu oynayacaq.
Azərbaycan Kənd Qadınları Assosiasiyasının sədri və layihənin koordinatoru Gülbəniz Qənbərova bildirib: "Ağalıda yaradılan bu kooperativ sadəcə yeni bir təsərrüfat subyekti deyil. Bu, xanımların zəhmətinin, iradəsinin və gələcəyə inamının təcəssümüdür. Biz inanırıq ki, qadınların kollektiv biznes modeli kənd yerlərində daha çox istehsal, daha çox satış, daha yüksək gəlir və daha dayanıqlı sosial rifah yaradacaq. Ağalının təşəbbüskar qadınları azad edilən ərazilərdə kollektiv qadın sahibkarlığının ilk nümunəsini formalaşdırmaqla tarix yazırlar."
Layihə çərçivəsində formalaşan kooperativ yalnız iqtisadi dividendlərlə məhdudlaşmır. O, həm də qadınların yerli qərarqəbuletmə proseslərində rolunu artıracaq, onların liderlik potensialını inkişaf etdirəcək, yeni institusional əməkdaşlıq əlaqələri quracaq və kənd icmasının sosial-iqtisadi tərəqqisinə uzunmüddətli təsir göstərəcək.
Ağalı qadınlarının bu təşəbbüsü gələcəkdə azad edilmiş digər rayonlarda da analoji qadın kooperativlərinin formalaşdırılması üçün yol xəritəsi olacaq. Burada sınaqdan çıxarılan uğurlu təcrübə və metodologiya növbəti regional təşəbbüslərin əsas bazasını təşkil edəcək.
Azərbaycan Kənd Qadınları Assosiasiyası bundan sonra da kənd qadınlarının iqtisadi imkanlarının genişləndirilməsi, qadın sahibkarlığı ekosisteminin inkişafı, kooperativ hərəkatının gücləndirilməsi və regionlarda dayanıqlı məşğulluğun artırılması istiqamətində ardıcıl fəaliyyətini davam etdirəcək.
