UNEC Zaqatala filialının yaradılmasının 10 illik yubileyi münasibətilə keçirilən tədbirlərdə Naxçıvan Dövlət Universitetinin rektoru Elbrus İsayev də iştirak edib.
“Tehsil365” xəbər verir ki, yubiley proqramı çərçivəsində Zaqatala Heydər Əliyev Mərkəzində “Rəqəmsallaşma dövründə regional universitet modeli” mövzusunda beynəlxalq konfrans təşkil olunub. Tədbir çərçivəsində Turizm Otağının, professor Məsud Əfəndiyevin adını daşıyan auditoriyanın və Regional İnnovasiya Mərkəzinin açılışı baş tutub.
Beynəlxalq elmi-praktiki konfrans çərçivəsində keçirilən “Regional universitetlərin regionların sosial-iqtisadi inkişafına təsiri” mövzusunda dəyirmi masada çıxış edən NDU rektoru Elbrus İsayev universitetin inkişaf strategiyası və regional ali təhsilin gələcək perspektivləri barədə fikirlərini bölüşüb.
Rektor bildirib ki, Naxçıvan Dövlət Universiteti muxtar respublikada yerləşməsinə baxmayaraq, təşkilati-struktur və kampus modeli baxımından ölkə əhəmiyyətli ali təhsil müəssisəsidir. O qeyd edib ki, universitet əcnəbi tələbələrin sayına görə ölkədə lider mövqedədir və beynəlxalq akademik əməkdaşlıqlar istiqamətində mühüm uğurlar əldə edib.
Elbrus İsayev çıxışında NDU-da son beş ildə uğurla tətbiq olunan Triple Helix (universitet–sənaye–dövlət əməkdaşlığı) modelinin universitetin inkişafına mühüm töhfə verdiyini də vurğulayıb.
O, beynəlxalq ali təhsil siyasətində regional universitet anlayışının dəyişdiyini bildirərək qeyd edib ki, müasir dövrdə əsas meyar universitetin yerləşdiyi məkan deyil, yerinə yetirdiyi missiyadır. Bu baxımdan NDU-nun fəaliyyətinin regional, milli və qlobal təsir istiqamətlərində inkişaf etdiyi diqqətə çatdırılıb.
Dəyirmi masa çərçivəsində regional universitetlərin inkişafı ilə bağlı bir sıra təkliflər də səsləndirilib. Təkliflər arasında universitetlərin fəaliyyətinin qiymətləndirilməsində “üçüncü missiya” indikatorlarının nəzərə alınması, istehsalat müəssisələri ilə əməkdaşlığın genişləndirilməsi, professor-müəllim heyətinin region universitetlərinə rotasiya əsasında ezam olunması və ixtisaslaşma modelinə keçidin təşviqi yer alıb.
Səfər zamanı tədbirin yüksək səviyyədə təşkilinə görə təşkilatçılara təşəkkür ifadə olunub, UNEC Zaqatala filialının regionun sosial-iqtisadi inkişafına və yüksək ixtisaslı kadr hazırlığına mühüm töhfə verdiyi vurğulanıb.
