Naxçıvan Dövlət Universiteti (NDU) ilə Pekin Kimya Texnologiyaları Universiteti arasında imzalanan əməkdaşlıq memorandumunun icrası çərçivəsində universitetin 10 nəfərlik nümayəndə heyəti Çin Xalq Respublikasında ali təhsilin idarə edilməsi sahəsində təşkil olunan beynəlxalq təlim proqramını uğurla başa vurub.
“Tehsil365" xəbər verir ki, Pekində keçirilən və ümumilikdə 120 saat davam edən proqram Beijing University of Chemical Technology və Beijing Information Science and Technology University tərəfindən təşkil olunub.
Bildirilib ki, proqramın məqsədi ali təhsil müəssisələrinin idarə edilməsi sahəsində müasir yanaşmaların öyrənilməsi, beynəlxalq təcrübənin mənimsənilməsi və universitetlər arasında akademik əməkdaşlığın genişləndirilməsi olub.
Təlimlər zamanı iştirakçılar Çində ali təhsilin idarəetmə modeli, universitetlərin strateji inkişafı, rəqəmsal transformasiya, keyfiyyət təminatı, süni intellektin təhsilə inteqrasiyası, beynəlxalq reytinqlər, elmi tədqiqatların idarə olunması və universitet–sənaye əməkdaşlığı kimi mövzular üzrə məlumat əldə ediblər.
NDU nümayəndə heyəti interaktiv mühazirə, seminar və praktik sessiyalar vasitəsilə Çinin qabaqcıl ali təhsil təcrübələri ilə yaxından tanış olub, onların universitetdə tətbiqi imkanlarını qiymətləndirib.
Qeyd olunub ki, proqram çərçivəsində təşkil edilən mədəni tədbirlər iştirakçıların Çinin tarixi, mədəni irsi və müasir inkişaf modeli ilə tanış olmasına, həmçinin iki ölkə arasında akademik və mədəni əlaqələrin möhkəmlənməsinə töhfə verib.
Vurğulanıb ki, beynəlxalq təlim proqramı Naxçıvan Dövlət Universitetində akademik və inzibati heyətin peşəkar inkişafının gücləndirilməsi, eləcə də müasir idarəetmə yanaşmalarının tətbiqi istiqamətində mühüm əhəmiyyət daşıyır.
