Naxçıvan Dövlət Universitetində Elmi fəaliyyətin təşkili və təhlili şöbəsinin baş mütəxəssisi Zamin Babazadə və Tarix-filologiya fakültəsinin IV kurs tələbəsi Murad Qənbərovun həmmüəllifi olduqları “Sosial media platformalarında Azərbaycan ədəbiyyatının təbliği” kitabının təqdimatı keçirilib.
“Tehsil365" xəbər verir ki, tədbiri giriş sözü ilə açan Elmi fəaliyyətin təşkili və təhlili şöbəsinin müdiri Ənvər İbrahimov müəllifləri təbrik edərək kitabın sosial medianın elmi araşdırmaların və milli-mədəni dəyərlərin geniş auditoriyaya çatdırılmasındakı rolunu əks etdirdiyini bildirib.
Kitab haqqında məlumat verən Zamin Babazadə nəşrdə sosial media platformalarının milli-mədəni irsin təbliğində rolu, mövcud problemlər, aparılan araşdırmalar və əldə olunan nəticələrin yer aldığını qeyd edib. Onun sözlərinə görə, tədqiqat çərçivəsində keçirilən müxtəlif sorğuların nəticələri də kitabda əks olunub.
Təqdimat mərasimində Tarix-filologiya fakültəsinin dekanı Arif Ağalarov, “Ədəbiyyat və kitabxanaçılıq” kafedrasının müdiri Nurlana Əliyeva və “Jurnalistika və rəqəmsal media” kafedrasının müdiri Şəhla Şirəliyeva çıxış edərək kitabın aktuallığını və elmi əhəmiyyətini vurğulayıblar.
Tədbirdə çıxış edən digər iştirakçılar da müəllifləri təbrik edib, onlara gələcək elmi fəaliyyətlərində uğurlar arzulayıblar.
Sonda həmmüəllif Murad Qənbərov universitet rəhbərliyinə, müəllimlərə və tədbir iştirakçılarına təşəkkürünü bildirib, xatirə fotosu çəkdirilib.
