Azərbaycan Kibertəhlükəsizlik Təşkilatları Assosiasiyasının təşkilatçılığı, Dövlət Təhlükəsizliyi Xidmətinin Milli Kibertəhlükəsizlik Mərkəzinin, Gənclər və İdman Nazirliyinin, Mingəçevir Dövlət Universitetinin əsas tərəfdaşlığı ilə keçirilən V “Cyber Summer School 2026” kiberyay düşərgəsində ənənəyə uyğun olaraq “Capture The Flag” (CTF) yarışı keçirilib.
“Tehsil365” xəbər verir ki, AKTA-nınqızıl üzvü olan “Yer.az” şirkətinin tərəfdaşlığı ilə təşkil olunan kibertəhlükəsizlik yarışında düşərgə iştirakçılarından ibarət 26 komanda mübarizə aparıb. CTF yarışı enerji sektorunda kibertəhlükəsizliyin təmin olunması mövzusuna həsr edilib. İştirakçılar enerji infrastrukturlarının kibermüdafiəsinə dair real vəziyyətləri əks etdirən tapşırıqları həll edərək texniki biliklərini, analitik düşüncə bacarıqlarını və komanda şəklində işləmək qabiliyyətlərini nümayiş etdiriblər. Yarış iştirakçıların düşərgə müddətində əldə etdikləri nəzəri bilikləri praktik mühitdə tətbiq etmələrinə, eləcə də kibertəhlükəsizlik sahəsində peşəkar bacarıqlarını inkişaf etdirmələrinə imkan yaradıb. Yekunda ən yüksək nəticə göstərən ilk üç komanda V “Cyber Summer School 2026”nın bu gün keçiriləcək bağlanış mərasimində diplom və hədiyyələrlə mükafatlandırılacaq.
Qeyd edək ki, iyulun 6-dan 11-dək keçirilən V “Cyber Summer School 2026” kiberyay düşərgəsinin əsas məqsədi ölkədə kibertəhlükəsizlik sahəsində peşəkar insan kapitalının inkişafına töhfə vermək, gənclərin nəzəri bilik və praktiki bacarıqlarını gücləndirməkdir.
