İlk yardım göstərilməsi üçün hər bir insanın bacarmalı olduğu və borclu olduğu ən vacib addım "Hemlih manevri"dir.
Bu fikirləri həkim Rasif Bağırov “Tehsil365”ə müsahibəsində bildirib
– Rasif müəllim, Hemlih manevri necə icra edilir?
– “Xəstəni çevirərək arxası sizə tərəf olmaqla yerləşdirirsiniz. Döş qəfəsinin aşağı hissəsindən, qarın tərəfindən özünüzə doğru bərk şəkildə sıxırsınız. Bu hərəkəti bir neçə dəfə təkrarladıqda, hava kütləsi boğazda qalan və boğulmaya səbəb olan yad cismi xaric edir. Həmçinin, süni tənəffüsün verilməsi və qapalı ürək masajının aparılması da hər kəsin bilməli olduğu ən vacib ilk yardım bacarıqlarındandır.”
– "Adi qrip"in yaratdığı gizli təhlükələr nələrdir?
– “Tibbdə "yüngül xəstəlik" anlayışı yoxdur. Xüsusilə adi qripin yaratdığı fəsadlara diqqət çəkmək istərdim. Vaxtında müalicə edilməyən qrip ensefalit, meninqoensefalit kimi ağır fəsadlara və ya böyrəklərin sıradan çıxmasına səbəb ola bilər.”
– Bəs ürək nahiyəsində olan ağrılarla bağlı nə deyə bilərsiniz?
– “Cəmiyyətdə ürək nahiyəsində ağrı olduğu halda həkimə müraciət edilməsi ilə bağlı fikir formalaşsa da, əslində istənilən xəstəliyin ilkin əlamətləri ciddi qəbul olunmalı və mütləq həkimə müraciət edilməlidir.”
– Rasif müəllim, sonda oxucularımıza tövsiyəniz nə olardı?
– Əsas tövsiyəm odur ki, heç bir xəstəliyə qarşı etinasız yanaşmasınlar. İlk yardım bacarıqlarını öyrənmək isə hər birimizin vətəndaşlıq borcudur, çünki bu kiçik biliklər kritik məqamlarda bir insanın həyatını xilas edə bilər. Sağlamlığınıza zamanında diqqət göstərin.
Həkim Rasif Bağırovun sözlərinə görə, sağlamlıq məsələlərində etinasızlığın yeri yoxdur. O, hər bir vətəndaşı ilk yardım bacarıqlarını mənimsəməyə və istənilən sağlamlıq probleminə qarşı məsuliyyətli olmağa çağırır. Həkim vurğulayır ki, vaxtında göstərilən ilkin yardım və həkimə vaxtında müraciət, kritik anlarda insan həyatının xilas edilməsində həlledici rol oynayır. Sağlamlıq ən böyük sərvətdir və ona zamanında göstərilən qayğı gələcəkdə yarana biləcək ciddi fəsadların qarşısını almağın ən etibarlı yoludur.