Müdafiə Sənayesi Nazirliyinin Elmi-Tədqiqat İnstitutunda “Mühəndis hazırlığı və müdafiə sənayesi ekosisteminin inkişafı proqramı”nın 2025–2026-cı tədris ili üzrə hesabat və məzun günü tədbiri keçirilib.
“Tehsil365” AZERTAC-a istinadən xəbər verir ki, tədbir iştirakçıları Ümummilli Lider Heydər Əliyevin büstünün önünə gül dəstələri düzüblər.
Akt zalında davam edən tədbirdə Azərbaycan Respublikasının Dövlət Himni səsləndirilib, Ulu Öndər Heydər Əliyevin və şəhidlərimizin əziz xatirəsi bir dəqiqəlik sükutla yad edilib.
Nazir Vüqar Mustafayev çıxışında müasir dövrdə güclü müdafiə sənayesinin əsasını yalnız istehsal imkanları deyil, yüksək intellektual potensiala malik insan kapitalının təşkil etdiyini bildirib. O qeyd edib ki, Prezident, Müzəffər Ali Baş Komandan İlham Əliyevin rəhbərliyi ilə Azərbaycanın müdafiə sənayesi sürətli inkişaf mərhələsinə qədəm qoyub və bu inkişafın təməlində elm, təhsil və sənaye arasında qurulan səmərəli əməkdaşlıq dayanır.
Tədbir zamanı “Milli tədqiqatların dəstəklənməsi proqramı” çərçivəsində icra olunan “Milli energetik materialların inkişafı proqramı”nın qaliblərinə mükafatlar, “Mühəndis hazırlığı və müdafiə sənayesi ekosisteminin inkişafı proqramı” çərçivəsində həyata keçirilən “İxtisaslaşmış akademik tədris proqramı” və “İstehsalat təcrübəsi proqramı”nı uğurla başa vuran tələbələrə sertifikatlar, universitet-sənaye əməkdaşlığına verdikləri mühüm töhfələrə görə bir sıra ali təhsil müəssisələrinin rəhbərlərinə təşəkkürnamələr təqdim olunub.