Azərbaycan Minimal İnvaziv Cərrahlar Cəmiyyəti (AMİCC) tərəfindən 13-cü Regional konfrans Qusarda təşkil olunub.
“Tehsil365” Azertaca istinadən xəbər verir ki, iki gün davam edən konfransda ölkənin tanınmış tibb mütəxəssisləri bir araya gələrək müasir tibbin aktual mövzularını müzakirəyə çıxarıb, təcrübə mübadiləsi apararaq, praktiki bacarıqlarını inkişaf etdiriblər.
Konfransdan əvvəl Ümummilli lider Heydər Əliyevin abidəsi ziyarət olunaraq, xatirəsi ehtiramla anılıb.
Qusar rayon Heydər Əliyev Mərkəzində keçirilən konfransın ilk günündə canlı cərrahiyyə nümayişi, plenar iclaslar, elmi məruzələr və panel müzakirələri ilə yadda qalıb. Proqram çərçivəsində minimal invaziv cərrahiyyə, elektrocərrahiyyə prinsipləri, kəskin pankreatitin və qanaxmaların idarə olunması, endoskopik cərrahiyyə və digər aktual mövzular üzrə çıxışlar təqdim edilib.
Azərbaycan Minimal İnvaziv Cərrahlar Cəmiyyətinin sədri, professor Qurbanxan Müslümov minimal invaziv cərrahiyyə sahəsində tətbiq olunan müasir metodlar, beynəlxalq təcrübə, elmi yeniliklər və kadr hazırlığının əhəmiyyəti barədə fikirlərini bölüşüb. Regionlarda belə konfransların keçirilməsinin təcrübə mübadiləsi baxımından əhəmiyyətli olduğunu diqqətə çatdırıb.
Tədbirin əsas hissələrindən biri AMİCC-in “Kəskin pankreatitin idarə olunması üzrə klinik rəhbərliyi”nin yekun müzakirəsi və qəbuluna həsr olunmuş ekspert paneli olub. Bu cür müzakirələrin səhiyyə sistemində sübuta əsaslanan klinik yanaşmaların tətbiqinə və vahid müalicə standartlarının formalaşdırılmasına töhfə verəcəyi bildirilib.
Konfrans çərçivəsində tibb bacıları üçün ayrıca elmi sessiya da təşkil olunub.
Konfransın ikinci günündə praktiki təlimlər təşkil olunub. İştirakçılar lazer proktologiyası, cərrahi tikiş, CPR, traxeostomiya, endoskopiya və tibb bacıları üçün xüsusi praktik məşğələlərdə iştirak edərək nəzəri biliklərini praktik bacarıqlarla möhkəmləndirmək imkanı əldə ediblər.
