Bir çox insan güclü iş yükü olan dövrlərdə çəkinin artdığını müşahidə edir. Mütəxəssislərin fikrincə, bunun əsas səbəbi stresin özü deyil, onun yaratdığı həyat tərzi dəyişiklikləridir.
“Tehsil365” Oxu.az-a istinadən xəbər verir ki, bu barədə adaptiv bədən tərbiyəsi və idman üzrə mütəxəssis Olqa Derendeyeva-Kurtova Gazeta.ru-ya danışıb.
Bəzi insanlar yorğunluğu şirniyyat və fastfudla "kompensasiya edir", digərləri isə ağır iş günündən sonra nə qədər yemək yediklərinə nəzarəti itirirlər. Artıq iş saatlarından sonra idman, gəzinti və ya normal istirahət üçün nə enerji, nə də vaxt qalır. Nəticədə klassik bir vəziyyət yaranır: az hərəkət, keyfiyyətsiz yuxu və daha kalorili qidalanma - bu da çəkinin artmasına səbəb olur.
Onun sözlərinə görə, vaxt az olanda insanlar tam yeməkləri qəlyanaltılarla əvəz edirlər: səhər yeməyi əvəzinə qəhvə içirlər, ofisdə soyuducudan tez bir şey götürürlər, əsas yeməyi isə yalnız axşam qəbul edirlər.
Bundan əlavə, bir çox insanda "qida ilə mükafatlandırma" vərdişi formalaşır - ağır iş günündən sonra özünü dadlı yemək və ya bir qədəh spirtli içki ilə sevindirmək istəyi yaranır.
Mütəxəssis çəkini nəzarətdə saxlamaq üçün tövsiyələr verib: "Həftəlik qidalanma planını əvvəlcədən hazırlayın. Süni intellektdən istifadə edərək zülal, yağ və karbohidrat balansına uyğun menyu tərtib etmək mümkündür. Yeməkləri bir neçə günlük hazırlayıb porsiyalara bölün. Gün ərzində daha çox hərəkət edin: telefon danışığı zamanı gəzin, nahardan sonra 10 dəqiqə piyada gəzin, pilləkənlərdən istifadə edin, hər saat ayağa qalxın. Yuxu rejimini bərpa edin. Gecə kifayət qədər yatmaq mümkün deyilsə, evdən işləyənlər üçün 30-40 dəqiqəlik gündüz yuxusu faydalı ola bilər".
Olqa Derendeyeva-Kurtova vurğulayır ki, artıq çəki yaranıbsa, kəskin pəhrizə başlamaq məsləhət deyil. Uzunmüddətli stresdən sonra sərt məhdudiyyətlər daha çox pozuntulara səbəb olur. Daha effektiv yanaşma fiziki aktivliyi tədricən artırmaq, yuxunu normallaşdırmaq, sağlam qidalanmaya qayıtmaq və məşqlərə mərhələli şəkildə başlamaqdır.