Mil-Muğan regionu üzrə respublikanın ən yaxşı məktəblərinin siyahısı açıqlanıb.
“Tehsil365”in əldə etdiyi məlumata görə, bu barədə 2025-ci ilə aid tələbə qəbulu və ümumi təhsil müəssisələri üzrə buraxılış imtahanlarının nəticələrinə dair elmi-statistik materialların yer aldığı “Abituriyent” jurnalının 12-ci nömrəsində məlumat verilib.
Beyləqan rayonu üzrə 2025-ci ildə ümumtəhsil müəssisələrini 890 şagird bitirib, onların 887 nəfəri buraxılış imtahanında iştirak edib. Rayon məzunlarının 50 nəfəri 500-dən, o cümlədən 14 nəfəri 600-dən yuxarı bal toplayıb. Respublika üzrə yaxşı məktəblər siyahısına R.Həsənov adına I Aşıqlı kənd tam orta məktəbi daxil edilib. Rayonun ən yaxşı məktəbi sırasında isə S.Abbasov adına Çəmənli kənd tam orta məktəbi göstərilib.
İmişli rayonu üzrə 2025-ci ildə ümumtəhsil müəssisələrini 1212 şagird bitirib, onların 1188 nəfəri buraxılış imtahanında iştirak edib. Rayon məzunlarının 66 nəfəri 500-dən, o cümlədən 13 nəfəri 600-dən yuxarı bal toplayıb. Respublika üzrə yaxşı məktəblər siyahısına İ.Allahverdiyev adına Buludlu kənd tam orta məktəbi daxil edilib. Rayonun ən yaxşı məktəbləri sırasında isə 1 nömrəli şəhər məktəb-liseyi, A.Eminov adına 7 nömrəli şəhər tam orta məktəbi və Nurulu kənd tam orta məktəbi yer alıb.
Saatlı rayonu üzrə 2025-ci ildə ümumtəhsil müəssisələrini 895 şagird bitirib, onların 888 nəfəri buraxılış imtahanında iştirak edib. Rayon məzunlarının 50 nəfəri 500-dən, o cümlədən 18 nəfəri 600-dən yuxarı bal toplayıb. Respublika üzrə yaxşı məktəblər siyahısına 1 nömrəli şəhər tam orta məktəbi daxil edilib. Rayonun ən yaxşı məktəbləri sırasında isə Qaracalar, Əlisultanlı və Cəfərxan kənd tam orta məktəbləri qeyd olunub.
Sabirabad rayonu üzrə 2025-ci ildə ümumtəhsil müəssisələrini 1568 şagird bitirib, onların 1540 nəfəri buraxılış imtahanında iştirak edib. Rayon məzunlarının 68 nəfəri 500-dən, o cümlədən 15 nəfəri 600-dən yuxarı bal toplayıb. Bu il rayonun ən yaxşı məktəbləri sırasında 5 nömrəli şəhər tam orta məktəbi və Müğangəncəli kənd tam orta məktəbi qeyd olunub.
Beləliklə, Mil-Muğan regionu üzrə 500-dən yuxarı bal toplayan məzunların sayına görə Sabirabad rayonu 68 nəfərlə ilk, İmişli rayonu 66 nəfərlə ikinci, Beyləqan və Saatlı rayonları isə hər biri 50 nəfərlə növbəti pillələrdə qərarlaşıb.
Region üzrə respublikanın ən yaxşı məktəbləri siyahısında Beyləqan, İmişli və Saatlı rayonlarının məktəbləri yer alıb. Bununla yanaşı, Sabirabad rayonunda da yüksək nəticə göstərən məktəblər fərqləndirilib.