Azərbaycan Universiteti beynəlxalq əməkdaşlıq əlaqələrinin genişləndirilməsi, ikili diplom proqramlarının inkişafı və akademik mobillik imkanlarının artırılması istiqamətində mühüm addımlar atır. Qlobal akademik məkana inteqrasiyanın gücləndirilməsi məqsədilə həyata keçirilən layihələr tələbə və müəllimlərə beynəlxalq təcrübə imkanları yaradır, universitetin xarici tərəfdaşlıq şəbəkəsini daha da genişləndirir.
Universitetdən “Tehsil365”in sorğusuna cavab olaraq bildirilib ki, strateji inkişaf prioritetlərindən biri beynəlmiləlləşmənin gücləndirilməsi və qlobal akademik məkana inteqrasiyanın daha da dərinləşdirilməsidir. Bu istiqamətdə həyata keçirilən tədbirlər nəticəsində xarici ali təhsil müəssisələri ilə əməkdaşlıq əlaqələri genişlənir, yeni beynəlxalq layihələr və proqramlar reallaşdırılır.
Qeyd olunub ki, beynəlxalq əməkdaşlığın mühüm nümunələrindən biri İtaliyanın Tuscia Universiteti ilə birgə həyata keçirilən MBA proqramı üzrə ikili diplom layihəsidir. Proqramın artıq ikinci məzun buraxılışı baş tutub. İkili diplom proqramı tələbələrə iki universitetin diplomunu əldə etmək, beynəlxalq akademik təcrübə qazanmaq və qlobal əmək bazarında rəqabətqabiliyyətli mütəxəssis kimi formalaşmaq imkanı yaradır.
Universitet akademik mobilliyin inkişafına da xüsusi önəm verir. Türkiyə, Polşa, İtaliya, Almaniya və Şimali Makedoniyanın ali təhsil müəssisələri ilə həyata keçirilən müəllim və tələbə mübadiləsi proqramları beynəlxalq təcrübənin tədris prosesinə inteqrasiyasına və birgə elmi layihələrin inkişafına mühüm töhfə verir.
Beynəlmiləlləşmə siyasətinin əsas istiqamətlərindən biri də xarici tələbələrin universitet həyatına daha fəal cəlb edilməsidir. Son üç il ərzində universitetdə təhsil alan əcnəbi tələbələrin sayı iki dəfə artıb. Xarici tələbələrin akademik və sosial mühitə uyğunlaşmasını dəstəkləmək məqsədilə Azərbaycan dili hazırlıq proqramı da uğurla həyata keçirilir.
Universitet beynəlxalq tərəfdaşlıq şəbəkəsinin genişləndirilməsi, yeni ikili diplom və mübadilə proqramlarının yaradılması, qlobal akademik əməkdaşlığın gücləndirilməsi istiqamətində fəaliyyətini davam etdirir.