Peşə təhsili sistemində əmək bazarının tələblərinə uyğun yeni ixtisasların yaradılması istiqamətində növbəti addım atılıb.
“Tehsil365" xəbər verir ki, Elm və Təhsil Nazirliyinin Elm, ali və peşə təhsili şöbəsinin sektor müdiri Səbinə Babayeva "Peşə təhsili üzrə ixtisasların Təsnifatı"nın yenilənməsi məqsədilə keçirilən görüşdə peşə ixtisaslarının yeni təsnifatına 45 yeni ixtisasın daxil edildiyini bildirib.
Onun sözlərinə görə, yeni ixtisaslar telekommunikasiya avadanlıqlarının quraşdırıcısı, rəqəmsal marketinq və e-ticarət, qida istehsalı, rəqəmsal istehsal texnologiyaları və avadanlıqları (additiv texnologiyalar), eləcə də ahıl və xüsusi qayğıya ehtiyacı olan şəxslərə xidmət işçisi kimi sahələri əhatə edir.
Həmçinin qeyd olunub ki, ixtisas təsnifatı layihəsinin hazırlanmasında 10 dövlət qurumu və peşə assosiasiyası iştirak edib. Təklif verən qurumlar sırasında Əmək və Əhalinin Sosial Müdafiəsi Nazirliyi, İqtisadiyyat Nazirliyi, Dövlət Turizm Agentliyi, Rəqəmsal İnkişaf və Nəqliyyat Nazirliyi, Kənd Təsərrüfatı Nazirliyi və Mədəniyyət Nazirliyi yer alıb.
Bundan əlavə, Dövlət Dəniz və Liman Agentliyi, Dövlət Mülki Aviasiya Agentliyi, Azərbaycan Ət Assosiasiyası və Gözəllik Xidməti Sahəsində Sahibkarlara Dəstək İctimai Birliyi ilə də müzakirələr aparılıb.
S.Babayeva bildirib ki, layihə üzrə 95 yeni ixtisasla bağlı təklif təqdim edilib. Ən çox təklif Dövlət Dəniz və Liman Agentliyi (34 ixtisas) və Dövlət Mülki Aviasiya Agentliyi (22 ixtisas) tərəfindən verilib.