Peşə təhsili üzrə mövcud ixtisasların əhəmiyyətli hissəsinə qəbul həyata keçirilmir. Hazırda ixtisas təsnifatının yenilənməsi istiqamətində işlər davam etdirilir.
“Tehsil365” xəbər verir ki, bu barədə Elm və Təhsil Nazirliyinin şöbə müdiri Turxan Süleyman jurnalistlərə açıqlamasında məlumat verib.
Onun sözlərinə görə, iki ildən artıqdır ki, peşə təhsili üzrə ixtisasların təsnifatının yenilənməsi istiqamətində iş aparılır və yaxın iki ay ərzində bu proses yekunlaşdırılaraq hökumətə təqdim ediləcək.
Turxan Süleyman bildirib ki, hazırda peşə təhsili üzrə 800-dən çox ixtisas mövcuddur. Lakin onların 30-40 faizi üzrə tələbə qəbulu aparılmır.
Şöbə müdiri qeyd edib ki, ali təhsil üzrə yeni ixtisas təsnifatı 2025-ci ildən tətbiq olunur. Onun sözlərinə görə, peşə təhsilində də yenilənməyə ehtiyac var və hazırda layihə müzakirə mərhələsindədir.
Turxan Süleyman vurğulayıb ki, məqsəd ixtisasların sayını azaltmaq deyil, əmək bazarının tələblərinə uyğun yeni ixtisasların yaradılması və mövcud ixtisasların optimallaşdırılmasıdır.