Azərbaycan Dövlət Aqrar Universitetinin (ADAU) əməkdaşının həmmüəllifi olduğu elmi məqalə nüfuzlu beynəlxalq elmi jurnalda işıq üzü görüb. Tədqiqat Xəzər dənizi hövzəsində invaziv balıq növlərinin mənşəyi və yayılma yollarının müəyyənləşdirilməsinə həsr olunub.
“Tehsil365” xəbər verir ki, ADAU-nun Balıq məhsulları istehsalının texnologiyası kafedrasının müdiri, professor Namiq Mustafayevin həmmüəllifi olduğu elmi məqalə "Elsevier" nəşriyyatının yüksək impakt faktorlu Regional Studies in Marine Science jurnalında dərc edilib.
Tədqiqat çərçivəsində DNT barkodlaşdırılması üsulundan istifadə olunaraq Xəzər dənizi hövzəsində yayılmış invaziv xul (Rhinogobius) cinsinə aid populyasiyaların növ mənsubiyyəti və bölgəyə yayılma yolları araşdırılıb. Araşdırmanın nəticələri bioloji invaziyaların öyrənilməsi, akvakultura sahəsində ekoloji risklərin qiymətləndirilməsi və molekulyar taksonomiya istiqamətində mühüm elmi əhəmiyyət daşıyır.