Lisey və gimnaziyalara qəbul olmaq istəyən şagirdlər üçün müraciət müddəti daha bir gün artırılıb. Namizədlər 15 iyul saat 12:00-dək seçimlərini edə biləcəklər.
“Tehsil365” xəbər verir ki, bu barədə Məktəbəqədər və Ümumi Təhsil üzrə Dövlət Agentliyi (MÜTDA) məlumat yayıb.
Bildirilib ki, seçim prosesi başa çatdıqdan sonra şagirdlərin topladıqları ballara uyğun yerləşdirilməsi aparılacaq və qəbul nəticələri elan olunacaq. Avqust ayının birinci yarısında yerdəyişmə sistemi aktivləşdirildikdən sonra qəbul olunan şagirdlər üçün avtomatik sorğular yaradılacaq və sənəd qəbulu prosesinə başlanılacaq.
Qeyd edilib ki, lisey və gimnaziya seçimləri şəxsi kabinetlərdəki "İmtahanlar" bölməsinin "Lisey seçimi" hissəsi vasitəsilə həyata keçirilir. Namizədlər maksimum üç lisey seçə bilərlər. Bununla yanaşı, üç seçim etmək məcburi deyil və şagirdlərə yalnız təhsil almağı planlaşdırdıqları lisey və ya gimnaziyanı seçmələri tövsiyə olunur.