Gəncə Dövlət Universitetində 2025/2026-cı tədris ili üzrə Elmi Şuranın son iclası keçirilib.
GDU-dan “Tehsil365” ə bildirilib ki, universitetin rektoru Yusif Yusibov Azərbaycan dili kafedrasının əməkdaşı Mehriban Məmmədovanın Azərbaycan dili ixtisası üzrə, Ekologiya və təbiəti mühafizə kafedrasının əməkdaşı Gültəkin Qasımovanın Biokimya ixtisası üzrə dosent elmi adı, Azərbaycan və dünya ədəbiyyatı kafedrasının əməkdaşı Gülnar Hüseynovanın Azərbaycan ədəbiyyatı ixtisası üzrə fəlsəfə doktoru elmi dərəcəsi almaları münasibətilə təbrik edib, Azərbaycan Respublikasının Prezidenti yanında Ali Attestasiya Komissiyası tərəfindən verilmiş attestatları və diplomu təqdim edərək, onlara elmi-pedaqoji fəaliyyətlərində uğurlar arzulayıb.
Elmi Şuranın iclasında “44 gün Qarabağ – işğaldan azadlığa” adlı kitabın çap olunması və Azərbaycan həqiqətlərinin dünya ictimaiyyətinə çatdırılmasındakı xidmətlərinə görə Ümumi tarix kafedrasının dosenti Saidə İsmayılzadəyə Fəxri fərman təqdim olunub. Diqqətə çatdırılıb ki, dosent Saidə İsmayılzadənin və İrlandiyanın Tirinti Universitetinin professoru Patrik Uolşun həmmüəllif olduğu “44 gün Qarabağ – işğaldan azadlığa” adlı geniş həcmli kitabda Qarabağın ən qədim dövrlərdən bəri tarixi araşdırılıb tədqiq olunub, elmi cəhətdən mərhələlər üzrə təhlil edilib. Kitabda Azərbaycan xalqının öz süverenliyinin və tarixi iradəsinin bərpası, ərazi bütövlüyünü isə həm döyüş meydanında, həm də danışıqlar masasında necə təmin olunması faktlar əsasında qələmə alınıb.
Uzunmüddətli səmərəli elmi-pedaqoji fəaliyyəti və anadan olmasının 60 illik yubileyi münasibətilə Universitetin Coğrafiya kafedrasının baş müəllimi, siyasi elmlər üzrə fəlsəfə doktoru Arifə Əhmədliyə Fəxri fərman təqdim olunub.
Daha sonra rektor Yusif Yusibov Şura üzvlərini gündəlikdə duran məsələlərlə tanış edib.
İclasın gündəliyində duran birinci məsələ- növbəti tədris ilinə hazırlığın vəziyyəti haqqında İnzibati təsərrüfat işləri üzrə prorektor Fəxrəddin Həsənovun çıxışı dinlənilib. Prorektor universitetin tədris binalarında həyata keçiriləcək təmir-bərpa və abadlıq işləri, eləcə də maddi-texniki bazanın möhkəmləndirilməsi istiqamətində görüləcək tədbirlər barədə ətraflı məlumat verib.
Daha sonra 2025/2026-cı tədris ilində GDU Keyfiyyətin Təminatı Mərkəzinin yerinə yetirdiyi işlərə dair mərkəzin müdiri İsmayıl İsmayılovun ətraflı hesabat məruzəsi dinlənilib. İ.İsmayılov universitetdə təhsilin keyfiyyətinin təmin olunması istiqamətində görülmüş işlər, tədris prosesinin monitorinqi və qiymətləndirilməsi, tələbə və müəllim məmnunluğunun öyrənilməsi məqsədilə aparılmış sorğular, daxili keyfiyyət təminatı mexanizmlərinin tətbiqi və bu sahədə əldə olunmuş nəticələr barədə ətraflı məlumat verib. Həmçinin qarşıda duran vəzifələr, keyfiyyət təminatı sisteminin daha da təkmilləşdirilməsi istiqamətində nəzərdə tutulan tədbirlər və gələcək fəaliyyət planları haqqında danışıb.
İclasın gündəliyində duran növbəti məsələ- 2025/2026-cı tədris ilinin II yarısında keçirilmiş pedaqoji və istehsalat təcrübələrinin yekunları haqqında (təhsilin hər iki pilləsi üzrə) Təcrübə və karyera şöbəsinin müdiri Cabbar Qarayev çıxış edib. Diqqətə çatdırılıb ki, bağlanmış ikitərəfli müqavilələr əsasında univesitetin 1060-dan çox buraxılış kurs tələbəsi Gəncə şəhər üzrə 20-dən çox orta məktəbdə tədris təcrübəsində iştirak ediblər. Pedaqoji təcrübə müddətində tələbələr əldə etdikləri nəzəri bilikləri praktik fəaliyyətlə əlaqələndirib, tədris prosesinin təşkili, dərslərin planlaşdırılması və keçirilməsi, şagirdlərlə işin aparılması, həmçinin müəllim peşəsinin zəruri bacarıqlarına yiyələnmək imkanı qazanıblar. O da bildirilib ki, 2025/2026-cı tədris ilində müəssisələrlə bağlanmış ikitərəfli əməkdaşlıq müqaviləsi əsasında GDU-nun buraxılış kurs tələbələrinin istehsalat təcrübəsində də iştirakı təmin olunub. Tələbələr ixtisaslarına uyğun müəssisələrdə nəzəri biliklərini praktik bacarıqlarla möhkəmləndirib, peşə fəaliyyətinin xüsusiyyətlərini yaxından öyrənmək imkanı əldə ediblər.
Gündəlikdə duran bütün məsələlər müzakirə olunaraq Elmi Şura üzvləri tərəfindən qənaətbəxş hesab olunub.
Elmi Şuranın iclası cari məsələlərin müzakirəsi ilə başa çatıb.