Qarabağ Universitetində yeni kadr təyinatı həyata keçirilib. Cəmilə İsmayılzadə universitetin İctimaiyyətlə əlaqələr şöbəsinin müdiri vəzifəsinə təyin olunub.
“Tehsil365” xəbər verir ki, Qarabağ Universitetinin rektoru Şahin Bayramov bununla bağlı müvafiq əmr imzalayıb.
Cəmilə İsmayılzadə bakalavr təhsilini Bakı Dövlət Universitetində beynəlxalq münasibətlər ixtisası üzrə, magistratura təhsilini isə "2007–2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı" çərçivəsində Almaniyada alıb.
O, daha əvvəl Azərbaycan Dövlət Neft və Sənaye Universiteti, Azərbaycan–Fransız Universiteti (UFAZ) və Azərbaycan İdman Akademiyasında rəhbər vəzifələrdə çalışıb. Son olaraq isə Bakıda keçirilən Ümumdünya Şəhərsalma Forumunun 13-cü sessiyasının təşkilati komandasında şöbə müdiri vəzifəsini icra edib.
Qeyd edək ki, Cəmilə İsmayılzadə ictimaiyyətlə əlaqələr, kommunikasiya, universitet idarəetməsi və beynəlxalq əməkdaşlıq sahələrində geniş təcrübəyə malikdir.