Mingəçevir Dövlət Universiteti (MDU) ilə Azərbaycan Respublikasının Ekologiya və Təbii Sərvətlər Nazirliyi yanında Milli Hidrometeorologiya Xidməti arasında əməkdaşlığa dair memorandum imzalanıb.
“Tehsil365” xəbər verir ki, memorandum təhsil, elmi-tədqiqat, iqlim dəyişmələri, meteorologiya, erkən xəbərdarlıq sistemləri və müasir rəqəmsal texnologiyalar sahələrində əməkdaşlığı nəzərdə tutur.
Əməkdaşlıq çərçivəsində ekologiya, ətraf mühit, energetika, informasiya texnologiyaları və digər əlaqəli ixtisaslarda təhsil alan tələbələr üçün təcrübə və təlim proqramları təşkil ediləcək. Həmçinin Milli Hidrometeorologiya Xidmətinin mütəxəssisləri tədris prosesinə, seminarlara, ustad dərslərinə və elmi tədbirlərə cəlb olunacaqlar.
Bundan başqa, tərəflər Kür çayının hövzəsi üzrə birgə tədqiqatlar aparacaq, MDU-nun Dayanıqlı Enerji və Mühəndislik Sistemləri Tədqiqat İnstitutunun iştirakı ilə magistrant, doktorant və gənc tədqiqatçıların elmi-praktiki layihələrə cəlb edilməsi dəstəklənəcək.
Memoranduma əsasən meteoroloji məlumatların emalı, rəqəmsal xəritələşdirmə, modelləşdirmə, proqnozlaşdırma və erkən xəbərdarlıq sistemləri üzrə birgə fəaliyyət, eləcə də milli və beynəlxalq layihələrdə, qrant proqramlarında və elmi təşəbbüslərdə əməkdaşlıq həyata keçiriləcək.
