İyulun 15-də Azərbaycan Dövlət Pedaqoji Universitetinin (ADPU) Quba filialında universitet rəhbərliyinin filial heyəti ilə görüşü keçirilib.
ADPU-dan “Tehsil365” ə bildirilib ki, görüşdə ADPU-nun tədris işləri üzrə prorektoru dosent Eldar Aslanov, sosial və humanitar məsələlər üzrə prorektor professor Fikrət Rzayev, Quba filialının direktoru professor Yusif Alıyev, ADPU-nun Tədbirlərin təşkili və tələbələrlə iş şöbəsinin müdiri Turan Kərimli, İctimaiyyətlə əlaqələr və marketinq şöbəsinin müdiri Taleh Mirzəyev, filialın rəhbərliyi və professor-müəllim heyəti iştirak ediblər.
Görüş zamanı filialın tədris, elmi və təşkilati fəaliyyətinin daha da təkmilləşdirilməsi istiqamətində geniş müzakirələr aparılıb. Qeyd olunub ki, cari tədris ilindən etibarən Quba filialında regionun əmək bazarının tələbləri nəzərə alınmaqla Aqronomluq ixtisası üzrə tələbə qəbuluna başlanılır. Bildirilib ki, bu istiqamət kənd təsərrüfatı potensialı yüksək olan bölgənin inkişafına və ixtisaslı kadr hazırlığına mühüm töhfə verəcək.
Bununla yanaşı, növbəti illərdə də regionun sosial-iqtisadi inkişaf prioritetlərinə və əmək bazarının ehtiyaclarına uyğun olaraq bakalavriat və magistratura səviyyələri üzrə yeni ixtisas və ixtisaslaşmaların yaradılması perspektivləri müzakirə olunub. Bu istiqamətdə müvafiq təhlillərin aparılması, işçi qrupların yaradılması və aidiyyəti qurumlarla əməkdaşlığın genişləndirilməsinin vacibliyi vurğulanıb.
Görüşdə, həmçinin tələbələrin sosial-ictimai həyatda fəallığının artırılması, filialda tədbirlərin təşkili, eləcə də ictimaiyyətlə əlaqələr və marketinq fəaliyyətinin daha da gücləndirilməsi ilə bağlı fikir və təkliflər dinlənilib, filialın əldə etdiyi müsbət nəticələrin davamlılığının təmininin əhəmiyyəti qeyd olunub.
Çıxış edənlər universitetin inkişaf strategiyasına uyğun olaraq filialların potensialının gücləndirilməsi, təhsil mühitinin müasir çağırışlara uyğun inkişaf etdirilməsinin və regionlarda keyfiyyətli ali təhsilin əlçatanlığının artırılmasının əhəmiyyətini vurğulayıblar.
Görüş qarşılıqlı fikir mübadiləsi şəraitində keçib, səsləndirilən təkliflərin gələcək fəaliyyət planlarında nəzərə alınacağı bildirilib.