Azərbaycanda məktəblərdə rəqəmsal infrastrukturun genişləndirilməsi çərçivəsində hər bir şagirdin rəqəmsal alətlərə çıxışının təmin olunması əsas hədəflərdən biridir.
“Tehsil365” xəbər verir ki, bunu Elm və Təhsil Nazirliyi yanında Təhsil Sisteminin İnformasiyalaşdırılması İdarəsinin rəisi Vüsal Xanlarov “Rəqəmsal arxitektura: proqram idarəetməsi və nəticəəsaslı yanaşma” mövzusunda dəyirmi masada söyləyib. Onun sözlərinə görə, son illərdə məktəblərin kompüter təminatı əhəmiyyətli dərəcədə yaxşılaşıb. Əgər altı il əvvəl orta hesabla 33 şagirdə bir kompüter düşürdüsə, hazırda bu göstərici təxminən 6 şagirdə qədər azalıb.
V.Xanlarov qeyd edib ki, qarşıdakı dövrdə bütün müəllimlərin tam rəqəmsal iş mühiti ilə təmin olunması, məktəblərin vahid şəbəkədə birləşdirilməsi və təhsil məzmununun mərkəzləşdirilmiş şəkildə idarə edilməsi nəzərdə tutulur. Vahid şəbəkə həm də internet təhlükəsizliyinin gücləndirilməsinə, şagirdlərin zərərli və təhsilə aid olmayan məzmuna çıxışının məhdudlaşdırılmasına imkan yaradır.