Dövlət qurumlarında iyunun 24-də elan edilmiş daxili müsahibələr üzrə keçirilmə qrafiki müəyyənləşdirilib. Elan üzrə 4 dövlət orqanında mövcud olan 8 vakant vəzifə daxili müsahibəyə çıxarılıb. Qeydiyyatdan keçmiş 18 namizədlə ümumilikdə 21 müsahibənin keçirilməsi planlaşdırılır.
Dövlət İmtahan Mərkəzindən (DİM) “Tehsil365”ə bildirilib ki, ən yüksək müsabiqə göstəricisi Ekologiya və Təbii Sərvətlər Nazirliyinin Aparatında dövlət orqanı rəhbərinin köməkçisi vəzifəsi üzrə qeydə alınıb. Bir vakant yer uğrunda 7 namizəd mübarizə aparacaq.
Müsahibələrin iyulun 21-dən 27-dək keçirilməsi nəzərdə tutulur. Müsahibədə iştirak üçün qeydiyyatdan keçmiş namizədlər müsahibənin vaxtı və keçirilmə yeri ilə bağlı məlumatı şəxsi kabinetləri vasitəsilə əldə edə bilərlər.
DİM xatırladıb ki, müsahibələrin təşkili və keçirilməsi üçün həm Mərkəz, həm də aidiyyəti dövlət orqanları tərəfindən müvafiq resurs və vəsait ayrılır. Namizədlərin müsahibədə iştirak etməməsi üzrlü hal kimi qiymətləndirilmir və bu hallar Mərkəzin məlumat bazasında qeydə alınır.
Namizədlər müsahibənin keçirilmə tarixindən bir gün əvvəl saat 16:00-dək şəxsi kabinetlərində yerləşdirilən müraciət formasında “İMTİNA” düyməsini seçməklə iştirakdan imtina edə bilərlər. Həmçinin namizədlərə müsahibənin başlanma vaxtından ən azı 30 dəqiqə əvvəl müsahibənin keçiriləcəyi ünvanda olmaları tövsiyə edilir.