Qarabağ Universiteti 2026/2027-ci tədris ilindən etibarən Türkiyənin İstanbul Texniki Universiteti (İTÜ) ilə beynəlxalq ikili diplom proqramını həyata keçirəcək.
Universitetdən “Tehsil365”ə bildirilib ki, proqram Azərbaycan Prezidentinin “Azərbaycan Respublikasında ali təhsil sisteminin beynəlxalq rəqabətliliyinin artırılması ilə bağlı əlavə tədbirlər haqqında” 2025-ci il 22 iyul tarixli Sərəncamı çərçivəsində reallaşdırılacaq.
İTÜ ilə birgə həyata keçiriləcək proqram inşaat mühəndisliyi, elektrik və elektronika mühəndisliyi, mexanika mühəndisliyi və kimya mühəndisliyi ixtisaslarını əhatə edəcək. Tədris İTÜ-nün proqramları əsasında ingilis dilində təşkil olunacaq. Proqrama əsasən, tələbələr ilk üç tədris ilində Xankəndi şəhərində, sonuncu tədris ilində isə İstanbul şəhərində təhsil alacaqlar. Dörd il ərzində dərslərin İstanbul Texniki Universitetinin professor-müəllim heyəti tərəfindən tədris edilməsi nəzərdə tutulur.
Bildirilib ki, proqram üzrə bütün xərclər dövlət hesabına maliyyələşdiriləcək. Məzunlara həm Qarabağ Universitetinin, həm də İstanbul Texniki Universitetinin bakalavr diplomları təqdim olunacaq.
Proqram çərçivəsində Qarabağ Universitetində İTÜ-nün təcrübəsi əsasında laboratoriyalar yaradılacaq. Bu laboratoriyalarda həyata keçiriləcək tədris, tədqiqat və innovasiya fəaliyyətlərinin mühəndislik təhsilində yeni yanaşmaların tətbiqinə, sənaye müəssisələri ilə əməkdaşlığın genişləndirilməsinə və innovativ həllərin hazırlanmasına töhfə verəcəyi gözlənilir. Proqramın məzunları əldə etdikləri nəzəri bilik və praktiki bacarıqlar sayəsində yerli və beynəlxalq əmək bazarında geniş imkanlara malik olacaqlar.
Qeyd edək ki, “QS World University Rankings 2027” reytinqinə əsasən, İstanbul Texniki Universiteti Türkiyə ali təhsil müəssisələri arasında birinci, dünya universitetləri arasında isə 279-cu yerdə qərarlaşıb.