Rəqəmsal texnologiyaların inkişafı və onların müxtəlif sahələrdə tətbiqi müasir dövrdə əsas istiqamətlərdən birinə çevrilib. Bu sahədə aparılan elmi araşdırmalar regionlarda rəqəmsal transformasiya proseslərinin öyrənilməsinə imkan yaradır.
“Tehsil365” xəbər verir ki, Azərbaycan Dövlət İqtisad Universitetinin (UNEC) Zaqatala filialında “Region müəssisə və təşkilatlarında rəqəmsallaşma” adlı tədqiqat işi hazırlanıb.
Bildirilib ki, tədqiqat işinin müəllifləri i.f.d., dosent R.X. Qasımov, Ülkər İsfəndiyarova və Pərvanə İsmayılovadır. Araşdırma Şəki, Qax, Zaqatala və Balakən rayonlarında fəaliyyət göstərən müəssisə və təşkilatlarda rəqəmsallaşma səviyyəsinin öyrənilməsi məqsədilə keçirilmiş anket-sorğunun nəticələri əsasında hazırlanıb.
Sorğunun keçirilməsində UNEC Zaqatala filialının müəllimləri iştirak ediblər.
Tədqiqat işində region müəssisə və təşkilatlarında rəqəmsal texnologiyaların tətbiqi, rəqəmsallaşmanın mövcud vəziyyəti və bu istiqamətdə həyata keçirilən proseslər araşdırılıb.
Nəşrin elmi redaktoru professor Natiq Cavadovdur. Qeyd olunub ki, bu tədqiqat işi regionlarda rəqəmsal transformasiya proseslərinin öyrənilməsi, mövcud vəziyyətin qiymətləndirilməsi və gələcək inkişaf istiqamətlərinin müəyyənləşdirilməsi baxımından mühüm elmi mənbədir.