Elm, təhsil və sənaye arasında əməkdaşlığın gücləndirilməsi müdafiə sənayesinin inkişafında mühüm rol oynayır. Bu istiqamətdə həyata keçirilən proqramlar yüksəkixtisaslı mühəndislərin hazırlanmasına xidmət edir.
“Tehsil365” xəbər verir ki, Müdafiə Sənayesi Nazirliyinin Elmi-Tədqiqat İnstitutunda “Mühəndis Hazırlığı və Müdafiə Sənayesi Ekosisteminin İnkişafı Proqramı”nın 2025-2026-cı tədris ili üzrə hesabat və məzun günü tədbiri keçirilib.
Tədbirdə müdafiə sənayesi naziri Vüqar Mustafayev, ölkənin bir sıra ali təhsil müəssisələrinin rektorları və digər nümayəndələr iştirak ediblər.
Azərbaycan Texniki Universitetini (AzTU) tədbirdə rektor Vilayət Vəliyev və universitet tələbələri təmsil ediblər. Çıxış edən nazir Vüqar Mustafayev bildirib ki, müasir müdafiə sənayesinin əsasını istehsal imkanları ilə yanaşı, yüksək intellektual potensiala malik insan kapitalı təşkil edir.
Nazir qeyd edib ki, Azərbaycanın müdafiə sənayesinin inkişafında elm, təhsil və sənaye arasında qurulan əməkdaşlıq mühüm əhəmiyyət daşıyır.
Daha sonra AzTU tələbələrinin hazırladığı layihələr təqdim olunub. Universitet-sənaye əməkdaşlığına verdiyi töhfələrə görə AzTU rektoru Vilayət Vəliyev təşəkkürnamə ilə təltif edilib.
Tədbir çərçivəsində “Milli Tədqiqatların Dəstəklənməsi Proqramı” və “Mühəndis Hazırlığı və Müdafiə Sənayesi Ekosisteminin İnkişafı Proqramı” çərçivəsində uğur qazanan iştirakçılara mükafat və sertifikatlar təqdim olunub.
