Bakı Mühəndislik Universiteti (BMU) İnformasiya və kompüter texnologiyaları fakültəsinin III kurs tələbələri hazırladıqları innovativ proqram təminatı və rəqəmsal layihələri təqdim ediblər.
BMU-dan “Tehsil365” ə bildirilib ki, təqdimat zamanı tələbələr real problemlərin həllinə yönəlmiş beş fərqli layihənin ideyası, texniki imkanları, işləmə prinsipi və gələcək inkişaf perspektivləri barədə məlumat veriblər. Layihələrin hazırlanmasında müasir proqramlaşdırma texnologiyalarından istifadə olunub, tələbələr nəzəri biliklərini praktik məhsullara çevirmək bacarıqlarını nümayiş etdiriblər.
Təqdim olunan layihələrdən biri “Exam-AI” platformasıdır. Həbib Pənahlı, Abdulla Abbasov, Qurban Sadıqlı, Nihat Mərdanov və Aydın Əliyev tərəfindən hazırlanan layihə təhsil müəssisələrində imtahanların təşkili, keçirilməsi və qiymətləndirilməsi prosesinin rəqəmsallaşdırılmasını nəzərdə tutur. Java əsaslı intellektual platformada müəllim və tələbə panelləri vahid sistemdə birləşdirilib. Sistem testlərin avtomatik yoxlanılması, nəticələrin təhlili və hesabatların hazırlanması imkanlarına malikdir.
“Masam” layihəsi restoranlarda hesabın təqdim olunması və ödəniş prosesinin daha sürətli, rahat həyata keçirilməsinə xidmət edir. Sənan Həsənli, Aqil Qasımov, Yusif Cəfərli, Əli Kərimov, Amin Mirəliyev və Nurlan Nəcəfov tərəfindən hazırlanan bu sistem vasitəsilə müştərilər masa üzərində yerləşdirilən QR kodu skan edərək hesablarını smartfonlarında görə və ödənişi birbaşa həyata keçirə bilirlər. Layihə müştərilərin ofisiantı gözləməsinə ehtiyacı azaldır və restoranların idarəetmə prosesinin rəqəmsallaşdırılmasına imkan yaradır.
Polad Əliyev, İsaməddin Qurbanov, İslam Ağabalayev və Xəyal Şərifovun təqdim etdikləri digər layihə “StartTap” platformasıdır. Platforma innovativ ideyaya malik şəxslərin uyğun komanda üzvləri, həmtəsisçilər və tərəfdaşlar tapmasına kömək edir. Həmçinin istifadəçilərin bacarıqları, maraqları və məqsədləri əsasında əlaqə qurmasına, yeni komandalar formalaşdırmasına və startap layihələrini birgə inkişaf etdirməsinə şərait yaradır.
Həbib Pənahlının hazırladığı “Linux əsaslı WhatsApp botu” isə istifadəçinin məşğul olduğu və ya istirahət etdiyi vaxtlarda daxil olan zəng və mesajların avtomatlaşdırılmış şəkildə idarə edilməsini təmin edir. Node.js və Puppeteer texnologiyaları əsasında yaradılmış bot bildirişləri tanıyır, arzuolunmaz müraciətləri filtrləyir və qarşı tərəfə əvvəlcədən müəyyən edilmiş fərdiləşdirilmiş cavablar göndərir
“RetroRide” layihəsi isə Azərbaycanda klassik və retro avtomobillərə maraq göstərən şəxslər üçün ixtisaslaşmış rəqəmsal platformadır. Nihad Musayev və Nihat Dəmirovun ərsəyə gətirdiyi platforma klassik avtomobil sahiblərini və potensial alıcıları bir araya gətirir. İstifadəçilər avtomobillər haqqında ətraflı məlumat və şəkillər yerləşdirə, xüsusi filtrlər vasitəsilə axtarış apara və satıcılarla birbaşa əlaqə yarada bilirlər.
Təqdimatlar zamanı tələbələr layihələrin işlək prototiplərini və əsas funksiyalarını nümayiş etdiriblər.
Müəllim Rüstəm Əzimovun rəhbərliyi ilə həyata keçirilən bu layihə fəaliyyəti tələbələrin proqramlaşdırma, komanda işi, analitik düşünmə, problemin müəyyənləşdirilməsi, innovativ həllərin hazırlanması və rəqəmsal məhsulların təqdim edilməsi üzrə praktiki bacarıqlarının inkişafına mühüm töhfə verib.