Bakı Mühəndislik Universiteti (BMU) ilə Koreya Respublikasının İNHA Universiteti arasında həyata keçirilən beynəlxalq ikili diplom proqramına (BMU-İNHA İDP) 2026/2027-ci tədris ili üzrə qəbul prosesi başlayır.
Universitetdən “Tehsil365”ə bildirilib ki, proqrama qəbul iki mərhələdən ibarətdir. Namizədlər əvvəlcə Dövlət İmtahan Mərkəzinin (DİM) bakalavriat səviyyəsi üzrə qəbul imtahanlarında iştirak etməli və BMU-İNHA İDP üçün müəyyən edilmiş keçid balını toplamalıdırlar. Növbəti mərhələdə isə müraciətçilər İNHA Universitetinin təşkil etdiyi riyaziyyat, fizika və ingilis dili fənləri üzrə daxili yazılı imtahanda uğur qazanmalıdırlar.
Qeydiyyat və sənəd qəbulu iyulun 16-dan 31-dək onlayn qaydada aparılacaq. Namizədlər tələb olunan sənədləri xüsusi elektron anket vasitəsilə təqdim edə biləcəklər. Sənəd qəbulunun son tarixi avqustun 1-i saat 23:55-dir. BMU-İNHA İDP üzrə daxili imtahan avqustun 4-də keçiriləcək, nəticələrin isə avqustun 6-da elan olunması nəzərdə tutulur.
Bildirilib ki, qəbul olunan namizədlərin siyahısı Elm və Təhsil Nazirliyinə təqdim edilərək DİM-də rəsmi qeydiyyata alınacaq. Proqrama qəbul qazanan abituriyentlər BMU-İNHA İDP tələbəsi statusu əldə etdiklərinə görə DİM-in ixtisas seçimi mərhələsində iştirak etməyəcəklər. Proqrama qəbul olunmayan namizədlərin isə ixtisas seçimi prosesində iştirak etmələri üçün kifayət qədər vaxt ayrılıb.
BMU-İNHA İDP “2019-2023-cü illər üzrə Azərbaycan Respublikasında ali təhsil sisteminin beynəlxalq rəqabətliliyinin artırılması Dövlət Proqramı” çərçivəsində 2020-ci ildən icra olunur. Prezident İlham Əliyevin “Azərbaycan Respublikasında ali təhsil sisteminin beynəlxalq rəqabətliliyinin artırılması ilə bağlı əlavə tədbirlər haqqında” Sərəncamına əsasən proqramın icra müddəti 2030-cu ilədək uzadılıb.
2026/2027-ci tədris ili üzrə proqram çərçivəsində “Kompüter elmləri” (Süni intellekt mühəndisliyi), “Data analitikası” (Data elmləri), “İnformasiya texnologiyaları” və “Elektrik və elektronika mühəndisliyi” ixtisasları üzrə qəbul aparılacaq. Hər bir ixtisas üzrə 26 tələbənin qəbul edilməsi planlaşdırılır.
Tədris 3+1 modelinə əsasən təşkil olunur. Tələbələr 3 il BMU-da, 1 il isə İNHA Universitetində təhsil alırlar. Təhsilini uğurla başa vuran məzunlara hər iki ali təhsil müəssisəsinin bakalavr diplomu təqdim edilir.
Xatırladaq ki, cari ildə proqram üzrə 113 tələbə məzun olub. Bununla da BMU-İNHA ikili diplom proqramı üzrə məzunların ümumi sayı 256 nəfərə çatıb.