"Gözlədiyimdən daha yüksək nəticə göstərdim, bu balın zəhmətimin qarşılığı olduğunu düşünürəm".
“Tehsil365” “Azedu.az”a istinadən xəbər verir ki, Bu sözləri MİQ imtahanında 86,25 bal toplayan Azərbaycan dili və ədəbiyyatı müəllimliyi üzrə namizəd Təhminə Hacılı AzEdu.az-a açıqlamasında bildirib.
"2024-cü ildə Bakı Dövlət Universitetinin Filologiya fakültəsini bitirmişəm. Magistratura təhsilim yoxdur. MİQ imtahanına daxil olarkən həyəcanlı idim.
Açığı, sualların daha çətin olacağını gözləyirdim. Lakin imtahan zamanı gördüm ki, suallar gözlədiyimdən daha rahatdır. İmtahandan 86,25 bal topladım və nəticəmin bir qədər aşağı olacağını düşünürdüm. Bununla belə, imtahana çox əziyyətlə hazırlaşdığım üçün bu nəticəni zəhmətimin qarşılığı hesab edirəm və əldə etdiyim bala görə çox sevinirəm.
İxtisas sualları ümumilikdə orta səviyyədə idi. Həm asan, həm də düşündürücü suallar var idi, lakin çətin suallarla qarşılaşmadım. Kurikulum bölməsində xüsusilə situasiya tipli suallar bir qədər düşündürücü olsa da, suallar başa düşülən və cavablandırılması mümkün səviyyədə hazırlanmışdı.
Məncə, yaxşı hazırlaşan namizədlər üçün imtahanın öhdəsindən gəlmək mümkün idi. Çox asan olduğunu deməzdim, amma çalışan və mütəmadi hazırlaşan namizədlər üçün münasib səviyyədə idi.
İmtahanın təşkili ilə bağlı heç bir texniki problemlə qarşılaşmadım. Bütün proses rahat və qaydalara uyğun təşkil olunmuşdu.
Gələcəkdə müəllimlik fəaliyyətimi Bakı şəhərində davam etdirmək istəyirəm və vakansiya seçimində də Bakı məktəblərinə üstünlük verməyi planlaşdırıram".