Bakı Mühəndislik Universitetində (BMU) magistratura səviyyəsində açılan yeni ixtisaslaşmalardan biri də “Maliyyə nəzarəti və audit”dir. İxtisaslaşmanın əsas məqsədi maliyyə nəzarəti, audit, maliyyə hesabatlılığı, risklərin idarə olunması və daxili nəzarət sahələrində beynəlxalq standartlara uyğun yüksəkixtisaslı mütəxəssislər hazırlamaqdır.
“Tehsil365” xəbər verir ki, proqram magistrantlara müasir maliyyə sistemlərini təhlil etmək, maliyyə hesabatlarının etibarlılığını qiymətləndirmək, müəssisələrdə daxili nəzarət mexanizmlərini qurmaq və audit proseslərini beynəlxalq standartlara uyğun həyata keçirmək bacarıqları qazandıracaq. İxtisaslaşmanın cəmiyyətdə rolu isə şəffaf maliyyə idarəçiliyinin təmin edilməsinə, dövlət və özəl sektorda maliyyə intizamının gücləndirilməsinə, korrupsiya risklərinin azaldılmasına, investor etimadının artırılmasına və ölkənin iqtisadi inkişafına töhfə verən peşəkar auditor və maliyyə nəzarətçilərinin hazırlanmasından ibarətdir.
Tədris proqramı iki əsas mərhələdən ibarətdir. Birinci mərhələdə magistrantlarda fundamental nəzəri biliklər və tədqiqat bacarıqları formalaşdırılacaq, ikinci mərhələdə isə peşəkar ixtisas bilikləri dərinləşdiriləcək, praktiki hazırlıq aparılacaq və magistr dissertasiyası yerinə yetiriləcək. Eyni zamanda, tələbələrə akademik yazı və elmi etika, ali mikroiqtisadiyyat və makroiqtisadiyyat, beynəlxalq maliyyə hesabatları standartları, ekonometrik təhlil üsulları, elmi tədqiqat metodları, dövlət maliyyəsi və büdcə siyasəti, qiymətli kağızlar bazarı, maliyyə büdcələrinin hazırlanması, risklərin idarə olunması, rəqəmsal audit texnologiyaları, ESG və davamlılıq hesabatlılığı, eləcə də davamlı maliyyə və investisiya siyasəti istiqamətlərində nəzəri, analitik biliklər veriləcək.
İkinci mərhələdə təhsil daha çox peşəkar və tətbiqi istiqamətə yönələcək. Magistrantlar maliyyə auditi, maliyyə hesabatlarının təhlili, müəssisələrdə daxili nəzarət sistemləri, maliyyə hüququ, tədqiqat analitikası, monetar siyasət, bank əməliyyatlarına nəzarət, blokçeyn texnologiyaları və kriptovalyutalar üzrə bilik və praktiki bacarıqlar əldə edəcəklər. Proqram həm elmi-tədqiqat fəaliyyətinə, həm də peşəkar audit və maliyyə nəzarəti sahəsində fəaliyyətə hazırlığı təmin edəcək.
Tədris prosesi beynəlxalq maliyyə hesabatları standartlarının tətbiqinə əsaslanan təlim, tədqiqatyönümlü təhsil modeli, real biznes nümunələri, rəqəmsal audit və analitik proqramlardan istifadə, ekonometrik və statistik analiz metodları, problem əsaslı öyrənmə, layihə və təqdimat əsaslı qiymətləndirmə, komandada işləmə və elmi müzakirələr, həmçinin müasir maliyyə texnologiyalarının öyrənilməsi əsasında təşkil olunacaq.
Proqram çərçivəsində magistrantlara məcburi və seçmə fənlər tədris ediləcək.
Son semestrdə magistrantlar elmi-pedaqoji təcrübə və elmi-tədqiqat təcrübəsi keçəcəklər. Bununla yanaşı, onlar magistr dissertasiyası hazırlayıb müdafiə edəcəklər. Bu mərhələ magistrantların əldə etdikləri nəzəri bilikləri praktikada tətbiq etmələrinə, elmi araşdırma aparmalarına və müstəqil tədqiqat bacarıqlarını nümayiş etdirmələrinə imkan yaradacaq.