Müddafiə Sənayesi Nazirliyinin Elmi-Tədqiqat İnstitununda “Mühəndis Hazırlığı və Müdafiə Sənayesi Ekosisteminin İnkişafı Proqramı” nın 2025-2026-cı tədris ili üzrə hesabat və məzun günü tədbiri keçirilib.
“Tehsil365” xəbər verir ki, tədbirdə müdafiə sənayesi naziri Vüqar Mustafayev, ölkənin bir sıra ali təhsil müəssisələrinin rektorları və digər şəxslər iştirak ediblər.
Hesabat tədbirində Azərbaycan Texniki Universitetini (AzTU) rektor Vilayət Vəliyev və universitetin tələbələri təmsil ediblər.
Nazir Vüqar Mustafayev çıxış edərək müasir dövrdə güclü müdafiə sənayesinin əsasını yalnız istehsal imkanları deyil, yüksək intellektual potensiala malik insan kapitalının təşkil etdiyini bildirib. O qeyd edib ki, möhtərəm Prezident, Ali Baş Komandan cənab İlham Əliyevin rəhbərliyi ilə Azərbaycan müdafiə sənayesi sürətli inkişaf mərhələsinə qədəm qoyub və bu inkişafın təməlində elm, təhsil və sənaye arasında qurulan səmərəli əməkdaşlıq dayanır.
Daha sonra AzTU tələbələrinin hazırladığı layihələr iştirakçılara təqdim olunub.
Tədbirdə universitet-sənaye əməkdaşlığına verdiyi mühüm töhfələrə görə AzTU rektoru Vilayət Vəliyev təşəkkürnamə ilə təltif olunub.
Həmçinin “Milli Tədqiqatlarının Dəstəklənməsi Proqramı” çərçivəsində icra olunan “Milli Energetik Materialların İnkişaf Proqramı”nın qaliblərinə mükafatlar, “Mühəndis Hazırlığı və Müdafiə Sənayesi Ekosisteminin İnkişafı Proqramı” çərçivəsində həyata keçirilən “İxtisaslaşmış Akademik Tədris Proqramı” və “İstehsalat Təcrübəsi Proqramı”nı uğurla başa vuran tələbələrə sertifikatlar təqdim olunub.