“Mən Jalə Kərimli 2025-2026cı tədris illəri müddətində Cənubi Koreya Respublikasının, İncheon şəhərində İNHA universitetində təhsil almışam. İxtisasım elektronika mühəndisliyidir”.
Bu sözləri “Tehsil365” ə müsahibəsində Jalə Kərimli deyib.
-Xaricdə təhsil təcrübəniz haqqında ümumi təəssüratınızı bölüşə bilərsiniz mi?
“Koreyada təhsil mənə həm dünya görüşü həm də akademik olaraq çox töhvələr vermişdir. Yeni mədəniyyət, yeni insanlar və yeni mühit mənim üçün unudulmaz xatirə olaraq yaddaşımda qalacaq”.
-Xaricdə təhsilin çətin tərəfləri hansılardır?
“Koreyada insanlar İngilis dilində çox az bilirlər, daha yaxşı əlaqə qurmaq üçün onların dilində yaxşı bilməlisiniz. Mən koreya dili bilirdim deyə çox da çətinlik çəkmədim. Mədəniyyət fərqi də bəzən çətinliklər törədə bilər, buna görə getməzdən öncə araşdırmaq bu kimi məsələləri asanlaşdırır. İnsanları ən çox maraqlandıran mövzulardan biri də yemək çətinlikləridir, mən sizə könül rahatlığı ilə deyə bilərəm ki, Koreya yeməkləri çox dadlıdır və məncə hər kəs sınamalıdır”.
-Bəs xaricdə təhsil almaq istəyənlərə hansı tövsiyyələri verərdiniz?
“Xaricdə təhsil sizə düşündüyünüzdən də çox təcrübələr qatacaq. Əgər xaricdə təhsil arzusu sizdə yaranıbsa, onun həyatə keçməsi üçün əlinizdən gələni edin. Nə qədər çətinliklər və hətta bəzən uğursuzluqlar baş versə də, inanın mənə gələcəkdə heç vaxt peşman olmayacaqsınız”.