İyulun 16-sı Şamaxıda Azərbaycan Respublikasının Gənclər Fondunun dəstəyi və ATGTİ-nin təşkilatçılığı ilə keçirilən “Yay Fest 2026” çərçivəsində “Rəqəmsal Dövlət” düşərgəsində maarifləndirici panel müzakirəsi təşkil edilib.
SDU-dan “Tehsil365” ə bildirilib ki, paneldə Sumqayıt Dövlət Universitetinin rektoru, texnika elmləri doktoru, professor Nurəli Yusifbəyli iştirak edərək düşərgə iştirakçıları ilə görüşüb.
Çıxışı zamanı rektor süni intellekt və rəqəmsal texnologiyaların ali təhsil sistemində yaratdığı imkanlardan söz açıb. Qeyd olunub ki, bu texnologiyalar tədris, elmi tədqiqat və idarəetmə proseslərinin daha səmərəli təşkili, məlumatların toplanması və təhlili, eləcə də əsaslandırılmış qərarların qəbulunda mühüm rol oynayır.
Eyni zamanda rektor bildirib ki, süni intellektin sürətli inkişafına baxmayaraq, yaradıcı düşüncə, analitik təfəkkür, etik məsuliyyət və düzgün qərarvermə kimi insana məxsus keyfiyyətlər öz əhəmiyyətini qoruyub saxlayır və gələcəyin təhsil sistemində də qorumağa davam edəcək.
Paneldə müasir əmək bazarında uğurun yalnız diplomla deyil, bilik, bacarıq və səriştənin vəhdəti ilə mümkün olduğu vurğulanıb. Professor N. Yusifbəyli ali təhsil müəssisələrinin əsas məqsədinin peşəkar kadrlarla yanaşı, yüksək mənəvi dəyərlərə malik, vətənpərvər, məsuliyyətli, analitik düşüncəli və güclü xarakterli gənclərin yetişdirilməsi olduğunu xüsusi qeyd edib.
"Ali təhsil müəssisələrinin əsas missiyası yalnız diplom verməklə məhdudlaşmamalı, eyni zamanda yüksək mənəvi dəyərlərə malik, vətənpərvər, məsuliyyətli, analitik düşüncəyə və güclü xarakterə sahib gənclər yetişdirmək olmalıdır", – deyə rektor bildirib.
Müzakirənin sonunda iştirakçıların sualları cavablandırılıb, təhsil, peşəkar inkişaf və gələcək karyera planlaması ilə bağlı fikir mübadiləsi aparılıb.
Qeyd edək ki, paneldə Sumqayıt Dövlət Universitetinin rektoru, professor Nurəli Yusifbəyli ilə yanaşı, Azərbaycan Respublikası Dövlət Gömrük Komitəsi Akademiyasının rəisi, gömrük xidməti general-mayoru Qulu Novruzov, Azərbaycan Dövlət Aqrar Universitetinin rektoru Zəfər Qurbanov və Azərbaycan Texnologiya Universitetinin rektoru Yaşar Ömərov da iştirak ediblər. Panel iştirakçıları rəqəmsal transformasiya, süni intellekt və ali təhsilin inkişaf perspektivləri ilə bağlı fikir və təcrübələrini tələbə-gənclərlə bölüşüblər.